दिवाळीच्या रात्री राज्यभरात २५ हून अधिक ठिकाणी आग

राज्यभरात दिवाळीचा सण मोठ्या उत्साहात आणि आतषबाजीने साजरा केला जात असतानाच दुसरीकडे फटाक्यांमुळे आणि विविध कारणांमुळे आगीच्या अनेक दुर्घटना समोर आल्या आहेत. मुंबई, ठाणे, नवी मुंबई, पुणे, नागपूर, अहिल्यानगर आणि चंद्रपूर या ठिकाणी एकाच रात्री आगीच्या अनेक घटना घडल्या. राज्यभरात २५ हून अधिक ठिकाणी आग लागल्याने भीतीचे वातावरण निर्माण झाले. सुदैवाने बहुतांश ठिकाणी अग्निशमन दलाच्या तत्परतेमुळे मोठी जीवितहानी टळली असली, तरी नागरिकांच्या मालमत्तेचे प्रचंड नुकसान झाले आहे.

ठाण्यात १७ मजली इमारतीला आग; रॉकेटवर बंदी

ठाण्यातील पोखरण रोड क्र. २ येथील रहेजा गार्डन संकुलातील ‘कार्लाय’ या १७ मजली इमारतीला रविवारी रात्री ८:३० च्या सुमारास भीषण आग लागली. आठव्या मजल्यावर लागलेली आग काही वेळात १४ व्या मजल्यापर्यंत पसरली. ठाणे व मुंबई अग्निशमन दलाच्या १० ते १५ गाड्यांनी ६ तासांच्या प्रयत्नांनंतर आगीवर नियंत्रण मिळवले. आपत्ती व्यवस्थापन विभागाने इमारतीत अडकलेल्या ५० हून अधिक रहिवाशांना आणि पाळीव प्राण्यांना सुखरूप बाहेर काढले. याशिवाय रहेजा गार्डन आणि कळवा भागातील आशर अरिज अशा तीन ठिकाणी आगीच्या घटना घडल्या.

घटनेची पाहणी केल्यानंतर उपमुख्यमंत्री एकनाथ शिंदे यांनी अग्निशमन दलाचे कौतुक करत कडक नियमावलीचे निर्देश दिले. त्यानुसार ठाणे जिल्हाधिकारी श्रीकृष्ण पांचाळ यांनी ठाणे जिल्ह्यात रॉकेट आणि हवेत फोडल्या जाणाऱ्या फटाक्यांवर तात्काळ बंदी घातली आहे. आता इतर फटाके फक्त खुल्या मैदानातच फोडता येतील.

नवी मुंबईत हवेचा दर्जा खालावला

लक्ष्मीपूजनाच्या दिवशी झालेल्या जोरदार आतषबाजीमुळे नवी मुंबई शहरात धुराचे साम्राज्य पसरले. काही भागांत हवेच्या गुणवत्तेचा निर्देशांक थेट ४५० पर्यंत पोहोचल्याची माहिती समोर आली आहे. त्यामुळे नागरिकांच्या आरोग्याचा प्रश्न निर्माण झाला आहे. तसेच नवी मुंबईतील सीवूड्स येथील ‘माऊली सोसायटी’च्या ६ व्या मजल्यावर फटाक्यांची ठिणगी उडाल्याने भीषण आग लागली. अग्निशामक दलाने वेळेवर पोहोचून नागरिकांना सुरक्षित बाहेर काढल्याने मोठी हानी टळली.

मुंबई, पुणे, नागपूरसह इतर शहरांतील स्थिती

मुंबईतही रात्री ठिकठिकाणी आगीच्या घटना घडल्या. विद्याविहार येथे रेल्वे स्थानकालगत असलेल्या ‘स्कायलाईन विहार’ या व्यापारी इमारतीच्या वरच्या मजल्यांना रात्री ११ च्या सुमारास आग लागली. काही वेळात आगीने तीन मजले खाक केले. कुर्ला पश्चिमेतील वसलानी इस्टेटमधील गोदाम, मुलुंड पूर्व एम.जी. रोड येथील इमारतीचा टेरेस, डोंगरी पोलीस ठाण्यासमोर असलेली दुकाने आणि अंधेरी लोखंडवाला परिसरातील एका निर्माणाधीन इमारतीला आग लागली.

पुणे शहरात दुपारी ३ ते रात्री ९ या ६ तासांच्या कालावधीत तब्बल २४ ठिकाणी आगीच्या घटना घडल्या. येरवडा, सदाशिव पेठ, वडगाव आणि खराडी या भागांत या घटना घडल्या असून अग्निशमन दलाने सर्व ठिकाणी वेळेत आग विझवली. सुदैवाने येथे कोणतीही जीवितहानी झाली नाही.

नागपूरमध्ये सावरकरनगर येथील साई डायनामिक्स टीव्हीएस शोरूमला फटाक्यांमुळे आग लागून अनेक दुचाकी जळून खाक झाल्या. तर शंकरपूर परिसरात एका फ्लॅटला आग लागली. चंद्रपूरमध्ये बालाजी वॉर्डात फटाक्याची ठिणगी उडून एका घराच्या दुसऱ्या माळ्याला भीषण आग लागली. अहिल्यानगरमधील संगमनेर येथे अकोले रोडवरील एका बॅटरीच्या दुकानाला फटाक्यांमुळे आग लागून दोन दुकानांचे मोठे नुकसान झाले.

नाशिक जिल्ह्यातील कळवण येथील सबस्टेशन रोडवर असलेल्या ‘आर. के. ट्रेडर्स’ या होलसेल किराणा मालाच्या गोदामाला लक्ष्मीपूजनाच्या दिवशी भीषण आग लागली. या आगीत गोदामातील कोट्यवधींचा माल जळून खाक झाला असून इमारतीचेही मोठे नुकसान झाले आहे. या दुर्घटनेत सुमारे साडेतीन कोटी रुपयांचे नुकसान झाल्याची माहिती आहे.

स्रोत: मूळ बातमी