अर्जुन राजपूतचे शतक; पाकिस्तानसमोर २०९ धावांचे आव्हान

अंडर-19 आशिया चषकातील एकदिवसीय सामन्यात भारत आणि पाकिस्तान आमनेसामने आले. या सामन्यात भारतीय फलंदाजीची पहिली फळी अक्षरशः ढेपाळली. मात्र पाचव्या क्रमांकावर आलेल्या अर्जुन राजपूतने एकाकी लढत देत दमदार शतक साजरे केले. त्याच्यामुळेच भारत आपल्या कट्टर प्रतिस्पर्धी असलेल्या पाकिस्तानसमोर 208 धावांचे आव्हान उभे करू शकला. भारताने नाणेफेक जिंकली होती, पण पहिल्या फळीतील फलंदाजांकडून अपेक्षित कामगिरी झाली नाही.

कर्णधार लक्ष्य रायचंदानी आणि आर्यवीर सेहवाग यांना खेळपट्टीवर टिकून खेळता आले नाही. कर्णधार तर एकही धाव न करता माघारी परतला. अली रजाने त्याला क्लीनबोल्ड केले. तिसऱ्या क्रमांकावर आलेला व्ही. के. विनित 8 धावांवर बाद झाला, तर यशबर्धन चौहान अवघ्या 1 धावेवर परतला. सेहवागने एक चौकार आणि एक षटकार मारत 22 धावा केल्या, पण तोही आपली विकेट टिकवू शकला नाही.

अर्जुनचे दमदार शतक

एकापाठोपाठ एक फलंदाज येत होते आणि परतत होते, पण अर्जुन एकटा टिकून राहिला. तो फक्त खेळपट्टीवर टिकलाच नाही, तर समोरून कोणतीही मदत मिळत नसतानाही त्याने पाकिस्तानच्या गोलंदाजांवर प्रतिहल्ला चढवला. त्याने 85 चेंडूंत 11 चौकार आणि 5 षटकारांच्या जोरावर 125 च्या सरासरीने 107 धावांची शतकी खेळी केली. त्याने मनल चौहानच्या साथीने 64 धावांची भागीदारी रचली, ज्यात अर्जुनच्या 50 धावांचा समावेश होता. अखेरच्या टप्प्यात काव्या पटेलने 23 धावांची दमदार फलंदाजी केली, ज्यामुळे भारताने 200 चा आकडा पार केला.

पाकिस्तानच्या गोलंदाजांची भेदक मारा

पाकिस्तानच्या गोलंदाजांनी मिळालेल्या प्रत्येक संधीचे सोने केले. अली रजाने 10 षटकांत 37 धावा देत 3 महत्त्वाच्या विकेट घेतल्या. त्याला नकीब सकीफ आणि रिझवानउल्लाह यांनी चांगली साथ दिली. या दोघांनाही प्रत्येकी 3 विकेट मिळाल्या. या तिघांनी भारताच्या धावगतीवर अंकुश मिळवण्यात यश संपादन केले. दरम्यान, भारताच्या गोलंदाजीलाही धार आहे, त्यामुळे दुसरा डाव रोमहर्षक होणार आहे.

स्रोत: मूळ बातमी