घराभोवती साप का येतात? या गोष्टी ठरतात निमंत्रण

घराच्या आसपास, बागेत किंवा घरात साप दिसला की अनेकांच्या मनात भीती निर्माण होते. आपल्याला दिसणारा प्रत्येक साप विषारीच असतो, अशी अनेकांची ठाम समजूत असते. मात्र प्रत्यक्षात परिस्थिती यापेक्षा खूप वेगळी आहे. भारतात सापांच्या हजारो प्रजाती आढळतात, पण त्यातील अगदी मोजक्याच प्रजाती विषारी आहेत.

प्रत्येक साप विषारी नसतो

भारतात आढळणाऱ्या सापांपैकी हाताच्या बोटावर मोजण्याइतक्याच प्रजाती विषारी आहेत. त्यामध्ये मण्यार, फुरसे, घोणस आणि नाग या चार प्रजातींचा समावेश होतो. या सापांच्याही काही उपजाती आहेत. त्यामुळे दिसणारा प्रत्येक साप धोकादायक असेलच, असं नाही. साप दिसल्यास त्याला मारण्याऐवजी सर्पमित्रांना फोन करावा. सर्पमित्र घरी येऊन सापाला सुरक्षितपणे पकडतात आणि पुन्हा निसर्गात सोडतात.

सापांना आकर्षित करणाऱ्या गोष्टी

घराच्या आसपास काही गोष्टी असल्या की साप तिथे येण्याची शक्यता वाढते. घराजवळ किंवा घरात पक्ष्यांची घरटी असतील, तर साप तिथे पक्ष्यांची शिकार करण्यासाठी किंवा त्यांची अंडी खाण्यासाठी हमखास येतात. जिथे पक्ष्यांची घरटी असतात, तिथे सापांना फार कष्ट न करता आयती शिकार मिळते, त्यामुळे अशा परिसरात सापांचा वावर जास्त असतो.

घरात उंदरांची संख्या जास्त असेल, तर तिथेही साप असण्याची शक्यता असते. उंदीर हे सापांचं सहज मिळणारं भक्ष्य आहे आणि उंदरांच्या बिळांमध्ये लपण्याची सोयही असते. त्यामुळे घरातील उंदरांवर नियंत्रण मिळवणं गरजेचं आहे.

ज्या ठिकाणी आर्द्रता जास्त आहे आणि लपण्यासाठी पुरेसा अंधार व अडचण आहे, अशा जागा सापांना आवडतात. त्यामुळे घर नेहमी स्वच्छ ठेवणं, अडचण दूर करणं आणि परिसर मोकळा ठेवणं हे सापांपासून दूर राहण्याचे सोपे उपाय आहेत.

स्रोत: मूळ बातमी