दिवाळी म्हटली की घराघरांत आनंद, फराळाचा सुगंध आणि फटाक्यांची आतषबाजी. प्रत्येकजण आपल्या कुटुंबासोबत हा सण साजरा करण्यात मग्न असतो. मात्र याच वेळी शहरातील प्रत्येक नागरिकाची दिवाळी सुरक्षित आणि आनंदात जावी, यासाठी काही जणांना स्वतःच्या सणाचा आनंद बाजूला ठेवावा लागतो. गणवेश घालून रस्त्यावर उभे राहणारे पोलिस कर्मचारी हेच त्या कर्तव्याचे खरे चित्र आहे.
बाजारपेठा, गर्दी आणि वाहतूक कोंडी
दिवाळीच्या दिवसांत बाजारपेठांमध्ये खरेदीसाठी मोठी गर्दी होते. त्यामुळे वाहतुकीची कोंडी, फटाक्यांमुळे घडणाऱ्या घटना आणि कायदा-सुव्यवस्थेचे प्रश्न निर्माण होतात. अशा वेळी नागरिकांची सुरक्षा सांभाळण्याची जबाबदारी पोलिसांवर असते. सणाच्या दिवसांतही त्यांना विश्रांती मिळत नाही. सामान्य नागरिक कुटुंबासोबत दिवाळीचा आनंद घेत असताना पोलिस मात्र रस्त्यावर उतरून आपले कर्तव्य बजावत असतात.
गर्दीच्या ठिकाणी वाढीव गस्त
दिवाळीच्या काळात बंदोबस्ताला विशेष महत्त्व असते. बाजारपेठा, प्रमुख चौक, गर्दीची ठिकाणे, धार्मिक स्थळे आणि सार्वजनिक परिसरात पोलिसांची गस्त वाढवली जाते. नागरिकांना खरेदी करताना त्रास होऊ नये, महिलांची सुरक्षा अबाधित राहावी, वाहतूक सुरळीत राहावी आणि कोणताही अनुचित प्रकार घडू नये, यासाठी पोलिस तासन्‌तास उभे राहून सेवा देतात.
या काळात अनेक पोलिस कर्मचाऱ्यांना आपल्या मुलांसोबत फटाके फोडता येत नाहीत, कुटुंबीयांसोबत फराळ करता येत नाही किंवा दिवाळीच्या शुभेच्छा देण्यासाठीही पुरेसा वेळ मिळत नाही. घरात दिवाळीची तयारी सुरू असते, पण कुटुंबातील सदस्यांच्या मनात आपल्या माणसाची ड्युटी कधी संपणार, याचीच प्रतीक्षा असते. पोलिस कर्मचाऱ्यांचे म्हणणे आहे की, त्यांनाही कुटुंबासोबत दिवाळी साजरी करावीशी वाटते, मुलांसोबत वेळ घालवावा आणि घरातील सणाच्या तयारीत सहभागी व्हावेसे वाटते. मात्र गणवेश परिधान केल्यानंतर नागरिकांच्या सुरक्षेची जबाबदारी सर्वांत महत्त्वाची ठरते. महिला, लहान मुले आणि ज्येष्ठ नागरिक सुरक्षितपणे बाहेर पडावेत, त्यांची खरेदी विनाअडथळा व्हावी, यासाठी ते प्रयत्नशील असतात. नागरिकांच्या चेहऱ्यावरील आनंद आणि सुरक्षिततेचे समाधान हेच त्यांच्यासाठी दिवाळीचे खरे बक्षीस आहे. नागरिकांनीही पोलिसांना सहकार्य करावे, वाहतुकीचे नियम पाळावेत आणि सुरक्षित दिवाळी साजरी करावी, असे आवाहन करण्यात आले आहे.
स्रोत: मूळ बातमी
Leave a Reply