भारताची माजी टेनिसपटू सानिया मिर्झा गेल्या काही महिन्यांपासून तिच्या खासगी आयुष्यामुळे चर्चेत आहे. घटस्फोटानंतर सानिया एकटीच मुलाचा सांभाळ करत आहे. तिचे पूर्व पती आणि पाकिस्तानी क्रिकेटर शोएब मलिक यांनी पाकिस्तानी अभिनेत्री सना जावेद यांच्यासोबत लग्न केले आहे. या पार्श्वभूमीवर गेल्या अनेक दिवसांपासून एकच प्रश्न सर्वजण विचारत आहेत, तो म्हणजे सानिया मिर्झा दुसरे लग्न करणार का? या प्रश्नावर सानियाने स्वतः एका टॉक शोमध्ये मोठा खुलासा केला आहे.
टॉक शोमध्ये काय म्हणाली सानिया?
अभिनेत्री नेहा धुपिया आणि अंगद बेदी यांच्या ‘डबल डेट’ या शोमध्ये सानिया मिर्झा पाहुणी म्हणून आली होती. तिच्यासोबत फराह खानदेखील होती. फराह आणि सानिया चांगल्या मैत्रिणी आहेत. या टॉक शोमध्ये सानियाने स्वतःच्या खासगी आयुष्याबद्दल मोठे खुलासे केले. तिने सांगितले की, ती सिंगल आहे आणि तिला तिच्या आयुष्यात दुसऱ्या कोणत्याच व्यक्तीची गरज नाही. टॉक शोमध्ये अंगदने सानियाला विचारले, ‘तुला कधी कोणत्या मित्राने कॉफी डेटसाठी विचारले नाही?’ यावर सानिया म्हणाली, ‘ते मला मुलांच्या ट्रिपसाठी बोलवतात आणि मला एक मुलगा म्हणूनच ट्रीट करतात.’ पुढे फराह म्हणाली, ‘मला माझे मित्र फोन करून विचारतात, सानिया खरंच सिंगल आहे का?’ यावर उत्तर देताना सानिया म्हणाली, ‘मी खरंच सिंगल आहे.’ पुढे अंगदने विचारले, ‘तुला असे कधी वाटत नाही का, एका पुरुषासोबत चांगले क्षण घालवावे?’ यावर फराह म्हणाली, ‘तुला काय माहित, ती आयुष्याचा आनंद घेत आहे की नाही?’ फराहला पाठिंबा देत सानिया म्हणाली, ‘माझ्या आयुष्यात कोणताच पुरुष नाही… आणि माहिती नाही, पुढे असू शकतो की नाही.’
सानिया आणि शोएब यांचा प्रवास
सानियाच्या खासगी आयुष्याबद्दल सांगायचे झाले, तर २०१० मध्ये तिने पाकिस्तानी क्रिकेटर शोएब मलिक यांच्यासोबत लग्न केले होते. दोघांनी एका मुलाचेही स्वागत केले. पण दोघांचे नाते फार काळ टिकले नाही. अखेर २०२३ मध्ये त्यांनी वेगळे होण्याचा निर्णय घेतला. सानिया ही शोएबची दुसरी पत्नी होती. घटस्फोटानंतर शोएब यांनी तिसरे लग्न पाकिस्तानी अभिनेत्री सना जावेद यांच्यासोबत केले. घटस्फोटानंतर शोएब यांना टीकेचा सामना करावा लागला. असेही समोर आले आहे की, शोएब यांच्या तिसऱ्या लग्नाला त्यांचे कुटुंबीय उपस्थित नव्हते आणि त्या लग्नाला कुटुंबियांचा विरोध होता.
स्रोत: मूळ बातमी
Leave a Reply