दिवाळीच्या खरेदीसाठी घराबाहेर पडलेल्या तीन तरुणांचा रस्त्यावर भीषण अपघातात मृत्यू झाला आहे. अहिल्यानगर जिल्ह्यातील शेवगाव-पैठण रस्त्यावर शुक्रवारी सायंकाळी साडेसहाच्या सुमारास ऊस वाहून नेणाऱ्या भरधाव ट्रकने दुचाकीला धडक दिली. धडक इतकी जोरदार होती की तिघांचाही जागीच मृत्यू झाला. या घटनेमुळे खानपूर गावावर आणि संपूर्ण परिसरात शोककळा पसरली आहे.
नेमकं काय घडलं?
प्राथमिक माहितीनुसार, खानपूर येथील तीन तरुण दिवाळीच्या खरेदीसाठी आपल्या दुचाकीवरून शेवगावच्या दिशेने निघाले होते. ते घोटण गावाजवळ आले असता, एका वाहनाला ओव्हरटेक करण्याच्या प्रयत्नात भरधाव उसाच्या ट्रकचालकाचे आपल्या वाहनावरील नियंत्रण सुटले. त्यानंतर अनियंत्रित ट्रकने दुचाकीला जोरदार धडक दिली. धडक इतकी भीषण होती की तिघांचा जागीच मृत्यू झाला.
मृत तरुणांची ओळख
या अपघातात प्राण गमावलेल्या तरुणांमध्ये एका १९ वर्षीय तरुणासह दोन अल्पवयीन मुलांचा समावेश आहे. मृतांची नावे ओंकार जगधने, अमर जगधने आणि रोहित धनुरे अशी असून तिघेही खानपूर गावचे रहिवासी आहेत. दिवाळीसारख्या आनंदाच्या सणाच्या तोंडावर एकाच गावातील तीन तरुण अपघातात मृत्यूमुखी पडल्यामुळे खानपूर गावावर आणि मृतांच्या कुटुंबीयांवर दुःखाचा डोंगर कोसळला आहे.
घटनेची माहिती मिळताच स्थानिकांनी घटनास्थळी गर्दी केली होती. पोलिसांनी तात्काळ घटनास्थळी धाव घेत पंचनामा केला असून या प्रकरणी पुढील कायदेशीर कारवाई सुरू आहे.
स्रोत: मूळ बातमी
Leave a Reply