कोल्हापूर जिल्ह्यातील कागल तालुक्यातून एक अत्यंत हृदयद्रावक घटना समोर आली आहे. पुण्यात नोकरी करत असलेल्या आणि अवघ्या महिन्याभरावर ज्याचे लग्न ठरले होते, अशा एका तरुणाचा दिवाळीच्या तोंडावर दुचाकी अपघातात दुर्दैवी अंत झाला आहे. या घटनेनंतर संपूर्ण कागल शहरात आणि जोशी कुटुंबात शोककळा पसरली आहे.
अपघातात प्राण गमावलेल्या तरुणाचे नाव अमेय दीपक जोशी असून त्याचे वय ३२ वर्षे होते. तो कागल येथील मुरगूड नाका परिसरातील रहिवासी होता. अमेय पुण्यात एका खासगी कंपनीत नोकरीला होता. त्याचे लग्न ५ डिसेंबर रोजी निश्चित झाले होते.
लग्नाची तयारी अंतिम टप्प्यात होती
विवाह सोहळ्यासाठी घरातील सर्वजण खूप उत्सुक होते. घरी लग्नाची जोरदार तयारी सुरू होती. नातेवाईकांसाठी पत्रिका छापून त्यांचे वाटप करणे, हॉलचे बुकिंग करणे आणि खरेदीची लगबग अंतिम टप्प्यात आली होती. ज्या घरात काही दिवसांत आनंदाची शहनाई वाजणार होती, तिथे आता दुःखाचा डोंगर कोसळला आहे.
उंब्रजजवळ टोलनाक्यावर अपघात
दिवाळीचा सण आई-वडिलांसोबत आणि कुटुंबासोबत आनंदाने साजरा करण्यासाठी अमेय पुण्याहून आपल्या दुचाकीवरून कागलकडे निघाला होता. प्रवासादरम्यान उंब्रजजवळ असलेल्या टोलनाक्यावर त्याची दुचाकी अचानक तेथील दांडक्याला धडकली आणि हा भीषण अपघात घडला. हा अपघात इतका भयानक होता की, अमेयच्या डोक्यावरील हेल्मेटचा पूर्णपणे चक्काचूर झाला आणि जागीच त्याचा प्राण गेला.
ऐन दिवाळीच्या दिवशी घडलेल्या या दुर्घटनेमुळे जोशी कुटुंबातील आनंदाचे वातावरण विरले असून सगळीकडे हळहळ व्यक्त होत आहे. मृत अमेयच्या मागे आई, वडील, भाऊ आणि काका असा परिवार आहे.
स्रोत: मूळ बातमी
Leave a Reply