दिवाळीच्या दिवसांमध्ये फराळ, रांगोळी आणि फटाक्यांच्या आतिषबाजीसह सण साजरा केला जातो. मात्र, उत्साहाच्या भरात फटाके फोडताना लहान मुलांसह मोठ्यांचाही हात, बोटे किंवा चेहरा भाजण्याची शक्यता असते. भाजल्यानंतर अनेक लोक घाबरून जातात आणि तातडीने काय करावे, हे सुचत नाही. अशा वेळी घाबरून न जाता योग्य ते उपचार करणे फार आवश्यक असते, कारण योग्य उपचारांमुळे त्वचेचे नुकसान कमी होते.
भाजल्यानंतर तातडीने काय करावे
फटाक्यांमुळे हात भाजल्यास सगळ्यात आधी हात थंड पाण्यात ठेवावा. वाहत्या थंड पाण्याखाली हात धरल्यास जळजळ कमी होण्यास मदत होते. दहा ते वीस मिनिटे थंड पाण्याखाली हात धरून राहावे. भाजल्यानंतर बर्फ किंवा अतिथंड पाण्याचा अजिबात वापर करू नये. भाजलेल्या भागावर सूज आल्यास हातातील अंगठी, बांगडी, घड्याळ किंवा इतर घट्ट वस्तू शक्य तितक्या लवकर काढून टाकाव्यात. मात्र, भाजल्यानंतर हाताला जखम झाल्यास घट्ट वस्तू काढण्याचा अजिबात प्रयत्न करू नये, कारण यामुळे जखम आणखीनच पसरू शकते.
या गोष्टी चुकूनही करू नका
भाजल्यानंतर बऱ्याचदा टूथपेस्ट, तूप, खोबरेल तेल, हळद किंवा बर्फ लावला जातो. मात्र, यामुळे जखम लवकर बरी होण्याऐवजी आणखीनच वाढू शकते. जखमेवर लावलेले पदार्थ अडकून राहण्याची शक्यता असते आणि त्यामुळे डॉक्टरांनाही जखमेवर योग्य उपचार करणे अवघड होऊन जाते. त्वचेला चिकटलेली वस्तू जबरदस्तीने ओढून काढल्यास त्वचेच्या आतील थराचे नुकसान होऊ शकते. भाजल्यानंतर थंड पाण्याने जखम स्वच्छ केल्यावर निर्जंतुक आणि त्वचेला न चिकटणारी पट्टी हलक्या हाताने लावावी. कापूस किंवा कोणतेही मलम किंवा कापड जखमेवर अजिबात लावू नये. त्वचेवर आलेले फोड किंवा जखमेवरील त्वचा हाताने ओढून काढू नये.
डॉक्टरांचा सल्ला कधी घ्यावा
फटाक्यांमुळे हात भाजला असल्यास जखमेची तीव्रता तपासणे फारच आवश्यक आहे. त्वचा पांढरी, काळी किंवा खोलवर भाजलेली दिसू लागल्यास तातडीने डॉक्टरांच्या सल्ल्याने योग्य ते उपचार करावेत. चेहरा, डोळे किंवा शरीराच्या मोठ्या भागावर भाजल्यास घरगुती उपाय करण्याऐवजी वेळीच डॉक्टरांचा सल्ला घ्यावा. हा लेख केवळ सामान्य माहितीसाठी आहे; कोणताही उपाय करण्यापूर्वी आपल्या डॉक्टरांचा सल्ला घ्यावा.
स्रोत: मूळ बातमी
Leave a Reply