‘दारू उत्पादन बंद करा, पाणी शेतकऱ्यांना द्या’ – राऊत

उजनी धरणाच्या पाण्यावरून सुरू असलेला वाद आता अधिकच तीव्र झाला आहे. उजनी धरण परिसरातील एआय सेंटर आणि इतर मुद्द्यांवरून झालेल्या आंदोलनानंतर आमदार रोहित पवार यांच्यावर भाजपने जोरदार टीका केली आहे. या आंदोलनाचे पडसाद आता उमटू लागले असून वाद थेट बारामती ॲग्रोपर्यंत पोहोचला आहे.

सात दिवसांत दुसऱ्यांदा हल्लाबोल

भाजपचे बार्शीचे आमदार राजेंद्र राऊत यांनी रोहित पवार यांच्यावर निशाणा साधला आहे. गेल्या सात दिवसांत राऊतांनी पवारांवर दुसऱ्यांदा हल्लाबोल केला आहे. बारामती ॲग्रोने दारूचे उत्पादन बंद करून ते पाणी शेतकऱ्यांना द्यावे, अन्यथा बारामतीत धरणे आंदोलन केले जाईल, असा इशारा राऊत यांनी दिला आहे.

स्वतःचे ठेवायचे झाकून आणि लोकांचे बघायचे वाकून, असे रोहित पवारांचे धोरण असल्याची टीका राऊत यांनी केली. उजनी आणि नीरा धरणातील पाण्याचा वापर बारामती ॲग्रोसाठी होत असल्याचा आरोपही त्यांनी केला आहे. दुष्काळ संपेपर्यंत पवारांनी स्वतःचे कारखाने बंद ठेवावेत, अशी मागणी राऊत यांनी केली.

२५ हजार कोटी लिटर पाण्याचा दावा

बारामती ॲग्रो कारखान्याला उजनी धरण आणि नीरा नदीतून २५ हजार कोटी लिटर पाणी दिले जाते, असा दावा राऊत यांनी केला आहे. दुष्काळी स्थितीत दारू बनवण्यासाठी पाणी वापरू नये, ते पाणी शेती आणि पिण्यासाठी द्यावे, असे त्यांचे म्हणणे आहे. हे पाणी बंद केले नाही तर बारामती ॲग्रोसमोर तीव्र धरणे आंदोलन छेडले जाईल, असा इशारा त्यांनी दिला.

रोहित पवार यांनी उजनी धरणातील पाणी, एआय डेटा सेंटर आणि एमपीएससीच्या आंदोलनावरून राज्य सरकारवर टीका केली होती. त्यानंतर राऊत आणि पवार यांच्यात हा वाद पेटला आहे. हा वाद आता कोणते वळण घेतो, याकडे सर्वांचे लक्ष लागले आहे.

स्रोत: मूळ बातमी