जळगाव जिल्ह्यात घरकुल योजनांची अपूर्ण कामे लवकर पूर्ण व्हावीत, यासाठी नियोजन करण्याचे निर्देश जिल्हा परिषदेच्या मुख्य कार्यकारी अधिकारी करिश्मा नायर यांनी दिले आहेत. जलतारा उपक्रमाची अंमलबजावणी करण्याचे आदेशही त्यांनी भुसावळ पंचायत समितीच्या अधिकाऱ्यांना दिले.
नायर यांनी ५ तारखेला भुसावळ तालुक्याच्या दौऱ्यादरम्यान पंचायत समितीच्या सभागृहात ग्रामसेवक, विस्तार अधिकारी आणि पंचायत समितीतील विविध विभागांचे अधिकारी व कर्मचारी यांची आढावा बैठक घेतली. बैठकीत ग्रामीण भागातील घरकुल योजनांची सद्यस्थिती, प्रलंबित घरकुलांची कामे, जलतारा उपक्रमाची अंमलबजावणी आणि इतर विकासकामांचा सविस्तर आढावा घेण्यात आला.
पात्र लाभार्थ्यांना वेळेत लाभ मिळावा
योजनांची प्रभावी अंमलबजावणी करून प्रलंबित कामे ठरलेल्या वेळेत पूर्ण करावीत, असे नायर यांनी सांगितले. पात्र लाभार्थ्यांना योजनांचा लाभ वेळेत मिळेल, यासाठी संबंधित अधिकारी व कर्मचाऱ्यांनी समन्वयाने काम करावे, अशा सूचनाही त्यांनी दिल्या.
नशिराबाद प्राथमिक आरोग्य केंद्राची पाहणी
त्यानंतर नायर यांनी नशिराबाद प्राथमिक आरोग्य केंद्रास भेट देऊन तेथील स्वच्छता, आरोग्य सुविधांची उपलब्धता आणि आरोग्यविषयक विविध बाबींची पाहणी केली. आरोग्य केंद्रातील परिसर व रुग्णसेवेशी संबंधित व्यवस्थेचा आढावा घेऊन त्यांनी स्वच्छतेला प्राधान्य देण्यासह रुग्णांना दर्जेदार आरोग्य सेवा उपलब्ध करून देण्याच्या सूचना संबंधित अधिकारी व कर्मचाऱ्यांना दिल्या.
स्रोत: मूळ बातमी
Leave a Reply