नंदूरबार जिल्ह्यातील दोन मोठ्या नेत्यांमधील राजकीय वाद पुन्हा एकदा उफाळून आला आहे. काँग्रेसचे ज्येष्ठ नेते आणि माजी मंत्री के. सी. पाडवी यांनी आमदार डॉ. विजयकुमार गावित आणि माजी खासदार डॉ. हिना गावित यांच्यावर तीव्र शब्दांत टीका केली आहे. पाडवी यांच्या टीकेमुळे दोन्ही नेत्यांमधील वाद आणखी वाढण्याची शक्यता आहे.
तिकीटही मीच दिले, मंत्रीही मीच केले
पाडवी म्हणाले की, डॉ. विजयकुमार गावित यांना आणि त्यांच्या वडिलांनाही निवडणुकीचे तिकीट त्यांनीच दिले होते. गावित यांना मंत्रीही त्यांनीच केले होते. मात्र ‘पापी माणसं पापीच असतात’, असे शब्द पाडवी यांनी वापरले.
७७१ कामे रद्द केल्याचा आरोप
पाडवी यांनी दावा केला की, ते मंत्री असताना त्यांनी हिना गावित यांना पैसे आणि रस्ते विकासासाठी निधी दिला होता. मात्र ते मंत्रीपदावरून गेल्यानंतर ७७१ कामे रद्द करण्यात आली. आपण मंजूर केलेली कामे डॉ. गावित यांनी आपणच केल्याचे दाखवले, असा आरोप पाडवी यांनी केला.
कोण आहेत के. सी. पाडवी?
पाडवी यांनी नंदूरबार जिल्ह्यातील अक्कलकुवा मतदारसंघाचे विधानसभेत प्रतिनिधित्व केले. त्यांचा जन्म ३ मार्च १९५७ रोजी नंदूरबार जिल्ह्यातील अक्रणी महाल तालुक्यातील असली गावी झाला. त्यांचे शिक्षण बीए, एलएलएमपर्यंत झाले आहे. त्यांना मराठी, हिंदी, इंग्रजीसह आदिवासी भाषा अवगत आहेत. पत्नी, एक मुलगा आणि एक मुलगी असा त्यांचा परिवार आहे. शेती आणि वकिली हा त्यांचा प्रमुख व्यवसाय आहे. पाडवी राज्याचे आदिवासी मंत्री होते. ते एकदा अपक्ष आणि सात वेळा काँग्रेसच्या तिकीटावर निवडून आले. त्यांना कॅबिनेट मंत्रीपद उशिरानेच मिळाले. साधी राहणी आणि प्रचंड लोकसंपर्क ही त्यांच्या राजकारणाची ओळख आहे.
स्रोत: मूळ बातमी
Leave a Reply