पश्चिम महाराष्ट्रात गेल्या तीन दिवसांपासून ऊस दरावरून सुरू असलेला संघर्ष अखेर शमला आहे. तब्बल ६१ तासांच्या प्रदीर्घ चक्काजाम आंदोलनानंतर स्वाभिमानी शेतकरी संघटनेने आंदोलन स्थगित करण्याची घोषणा केली आहे. किणी टोल नाका येथे झालेल्या महत्त्वाच्या बैठकीत ऊस दरावर सर्वमान्य तोडगा निघाल्यानंतर संघटनेचे नेते राजू शेट्टी यांनी आंदोलन मागे घेत असल्याचे जाहीर केले. यामुळे कोल्हापूर, सांगली, सातारा आणि सोलापूर जिल्ह्यातील साखर कारखाने सुरू होण्याचा मार्ग मोकळा झाला आहे.
स्वाभिमानी शेतकरी संघटनेने प्रतिटन ४२०० रुपये पहिली उचल मिळावी, या मागणीसाठी महामार्गावर ठिय्या आंदोलन सुरू केले होते. अखेर कारखानदारांनी नव्या फॉर्म्युल्याला मान्यता दिली आहे. त्यानुसार शेतकऱ्यांना प्रतिटन ३९०० रुपये थेट पहिली उचल म्हणून दिले जातील. चालू हंगामाकरिता अधिकचे १०० रुपये दिले जातील. भविष्यात साखरेचे बाजारभाव वाढल्यास आणखी २०० रुपये अतिरिक्त दिले जातील, असेही ठरले आहे.
आजचा बंदही मागे, वाहतूक पूर्ववत
किणी टोल नाक्यावर हजारो शेतकऱ्यांच्या उपस्थितीत बोलताना राजू शेट्टी म्हणाले की, शेतकऱ्यांच्या एकजुटीमुळे आणि संघर्षामुळेच कारखानदारांना हा निर्णय घ्यावा लागला आहे. मागणीनुसार तोडगा निघाल्याने शुक्रवारी पुकारण्यात आलेला महाराष्ट्र बंद देखील आता स्थगित करण्यात येत आहे. गेल्या ६१ तासांपासून पुणे-बेंगळुरू महामार्गावरील वाहतूक पूर्णपणे ठप्प झाली होती, त्यामुळे प्रवासी आणि वाहनधारकांचे मोठे हाल होत होते.
साखर हंगामाला गती मिळणार
आता आंदोलन मागे घेण्यात आल्याने महामार्गावरील वाहतूक सुरळीत सुरू झाली आहे. दर ठरल्याने गेल्या काही दिवसांपासून बंद असलेले साखर कारखाने आता पूर्ण क्षमतेने सुरू होऊन ऊस गाळप हंगामाला गती मिळणार आहे. ऊस दराचा प्रश्न सुटल्याने शेतकऱ्यांमध्ये समाधानाचे वातावरण आहे. गेल्या दोन महिन्यांपासून शेतकरी आपल्या घामाचा योग्य मोबदला मिळावा यासाठी लढा देत होते.
स्रोत: मूळ बातमी
Leave a Reply