विमानात स्फोटके ठेवल्याची धमकी मिळाल्यानंतर संपूर्ण युरोपात एकच खळबळ उडाली. धमकीचा फोन येताच सुरक्षा यंत्रणा सतर्क झाल्या आणि तब्बल १२ विमानांची आपत्कालीन लँडिंग करावी लागली. एकाच आठवड्यात दुसऱ्यांदा अशा प्रकारची घटना घडल्याने प्रवाशांमध्ये भीतीचे वातावरण पसरले. परिस्थिती लक्षात घेऊन तातडीने हाय अलर्ट जारी करण्यात आला आणि विमानतळांवरील सुरक्षा व्यवस्था अधिक कडक करण्यात आली.
कोणती विमाने उतरवण्यात आली
डब्लिनहून रोमकडे जाणारे एअर लिंगसचे विमान फ्रान्समधील एव्हरेक्स विमानतळावर सुरक्षितपणे उतरवण्यात आले. तर हेलसिंकीहून रोमला जाणारे विमान इटलीच्या हवाई दलाच्या देखरेखीखाली रोमच्या फ्युमिसिनो विमानतळावर आपत्कालीन पद्धतीने उतरवले गेले. त्यानंतर इटलीच्या पोलिसांनी या विमानाची सखोल तपासणी केली, मात्र त्यात कोणतीही स्फोटके सापडली नाहीत.
पोलंड एअर लाईन्सचे एक विमान बेल्जियममधील ब्रसेल्स झाव्हेंटम विमानतळावर आपत्कालीन लँड करण्यात आले. या विमानाचीही सखोल तपासणी झाली, पण त्यातही कोणतीही संशयास्पद वस्तू आढळली नाही. याशिवाय बल्गेरियात तीन विमानांची आपत्कालीन लँडिंग झाली. त्यामध्ये कोपनहेगनहून आलेली दोन विमाने आणि लंडन विमानतळावरून आलेले एक विमान होते.
झेक प्रजासत्ताकची राजधानी प्राग येथून निघालेल्या चार विमानांनाही बॉम्ब ठेवल्याची धमकी देण्यात आली होती. सुरक्षा यंत्रणांनी या विमानांची तपासणी केली आणि तपासणीनंतरच त्यांना पुन्हा उड्डाण करण्याची परवानगी देण्यात आली.
प्रवाशांमध्ये भीतीचे वातावरण
एकाच वेळी अनेक विमानांना धमक्या मिळाल्याने प्रवाशांची चांगलीच घाबरगुंडी उडाली. मात्र, दिलासादायक बाब म्हणजे तपासणीनंतर कोणत्याही विमानात बॉम्ब किंवा स्फोटके आढळून आलेली नाहीत. धमक्यांमुळे युरोपभरातील विमानतळांवर सुरक्षा व्यवस्था वाढवण्यात आली आहे.
स्रोत: मूळ बातमी
Leave a Reply