छत्रपती संभाजीनगरच्या डॉ. बाबासाहेब आंबेडकर मराठवाडा विद्यापीठाच्या दोन विद्यार्थिनींना देशाच्या संसदेत भाषण करण्याची मानाची संधी मिळाली आहे. शेख शिफा शमशु आणि अनिशा वसंत हांगे अशी या दोघींची नावे आहेत. लोकसभा सचिवालयाच्या संसदीय लोकशाही संशोधन आणि प्रशिक्षण संस्थेच्या ‘नो युवर लीडर’ या राष्ट्रीय उपक्रमासाठी त्यांची निवड झाली आहे.
३१ ऑक्टोबरला संसदेच्या संविधान सदनात सरदार वल्लभभाई पटेल यांच्या जीवनकार्यावर भाषण करण्याची संधी या दोघींना मिळाली. शालेय शिक्षण, उच्च शिक्षण आणि युवा कल्याण विभागाच्या समन्वयाने २०२२ पासून हा उपक्रम राबविला जातो. देशातील महान नेत्यांच्या जयंतीनिमित्त आयोजित होणाऱ्या कार्यक्रमासाठी विद्यापीठे आणि उच्च शिक्षण संस्थांकडून विद्यार्थ्यांची नामांकने मागविली जातात.
देशभरातून १०८ सहभागींची निवड
यंदा सरदार वल्लभभाई पटेल यांच्या जयंतीनिमित्त देशातील ३६ राज्ये आणि केंद्रशासित प्रदेशांतून १०८ सहभागींची निवड करण्यात आली. विद्यापीठात झालेल्या वक्तृत्व, वादविवाद आणि प्रश्नमंजूषा स्पर्धांमधील गुणवत्ता यादीच्या आधारे मौलाना आझाद महाविद्यालयाची शेख शिफा शमशु आणि स्वामी रामानंद तीर्थ महाविद्यालय, अंबाजोगाई येथील अनिशा हांगे यांची नामांकने पाठविण्यात आली होती.
त्यानंतर संस्थेतर्फे ऑनलाइन वस्तुनिष्ठ परीक्षा, वक्तृत्व कौशल्य, भाषेवरील प्रभुत्व आणि नेत्यांच्या विचारांची आधुनिक काळाशी सांगड घालण्याची क्षमता अशा विविध निकषांवर चाचणी घेण्यात आली. या चाचणीत दोघींनी यश मिळविले. त्यांच्या या यशाबद्दल कुलगुरू डॉ. विजय फुलारी यांच्या हस्ते दोन्ही विद्यार्थिनींचा सत्कार करण्यात आला.
सत्कार सोहळ्याला मान्यवरांची उपस्थिती
सत्कार सोहळ्याला कुलसचिव डॉ. संजय कवडे, विद्यार्थी विकास संचालक डॉ. कैलास अंभुरे आणि सांस्कृतिक समन्वयक गौतम सोनवणे उपस्थित होते. विद्यापीठाच्या दोन विद्यार्थिनींनी राष्ट्रीय पातळीवर मिळविलेल्या या यशाचे विद्यापीठ वर्तुळात कौतुक होत आहे.
स्रोत: मूळ बातमी
Leave a Reply