उत्तराखंडमध्ये भाविकांवर काळाने घाला घातला आहे. गंगोत्री धामला दर्शनासाठी निघालेल्या भाविकांची कार नदीत कोसळली. या अपघातामध्ये चार जणांचा मृत्यू झाला असून एक जण गंभीर जखमी झाला आहे, तर दोघे जण बेपत्ता आहेत.
अपघात कसा झाला
गुरुवारी सकाळी गंगोत्री राष्ट्रीय महामार्गावर गंगानीजवळ हा अपघात झाला. सात जणांना घेऊन जाणारी कार अनियंत्रित होऊन भागीरथी नदीत कोसळली. चालकाचे कारवरील नियंत्रण सुटले आणि कार थेट दोनशे मीटर खोल दरीत कोसळून नदीत पडली. या अपघातामध्ये कारचा चुराडा झाला.
सर्व प्रवासी गुजरातच्या साबरमती भागातील रहिवासी असून ते उत्तरकाशीहून गंगोत्री धामला दर्शनासाठी जात होते. अपघातामध्ये अशोकभाई पटेल, रुतिका अशोकभाई पटेल, घनश्यामभाई सरवालिया आणि सुरेंद्र सिंग यांचा मृत्यू झाला. चौघांचे मृतदेह बाहेर काढण्यात आले असून ते शवविच्छेदनासाठी रुग्णालयात पाठवण्यात आले आहेत.
बचावकार्य सुरू
अपघातामध्ये वेदांत अशोकभाई पटेल गंभीर जखमी झाला असून त्याला उपचारासाठी रुग्णालयात दाखल करण्यात आले आहे. तर सुधाबेन अशोकभाई पटेल आणि किरणबेन विशालभाई पटेल या दोघी बेपत्ता आहेत.
अपघाताची माहिती मिळताच पोलीस, एसडीआरएफ आणि रुग्णवाहिका घटनास्थळी दाखल झाली. मदत आणि बचाव पथकाकडून बेपत्ता झालेल्या दोघांचा शोध घेतला जात आहे. पोलीस आणि एसडीआरएफची पथके नदीकाठावर आणि आजूबाजूच्या परिसरात शोधमोहीम करत आहेत. अपघातानंतर परिसरात गोंधळाचे वातावरण आहे.
स्रोत: मूळ बातमी
Leave a Reply