धनत्रयोदशीपूर्वी सोन्याचे भाव कडाडले; १० ग्रॅमचा दर किती?

दिवाळी तोंडावर असताना सोन्या-चांदीच्या दरात मोठी वाढ झाली आहे. धनत्रयोदशीच्या आदल्या दिवशीच दरांनी उसळी घेतल्याने खरेदीचा विचार करणाऱ्या सर्वसामान्यांना दहा वेळा विचार करावा लागत आहे. अनेकजण धनत्रयोदशीच्या दिवशी सोने खरेदी करणे शुभ मानतात. त्यामुळे या दिवशी सोने खरेदीकडे अनेकांचा कल असतो. मात्र, यंदा दर वाढलेले असल्याने खरेदीदारांच्या खिशाला चांगलीच झळ बसणार आहे.

जळगाव सराफ बाजारातील दर

जळगावच्या सराफ बाजारात दिवाळीच्या पहिल्या दिवशी सोन्या-चांदीच्या दराने मोठी उसळी घेतली. सोन्याच्या दरात तब्बल ३,८०० रुपयांची तर चांदीच्या दरात ५,००० रुपयांची वाढ झाली आहे. सोन्या-चांदीच्या दरात सलग दुसऱ्या दिवशी मोठी वाढ झाली आहे. आज २४ कॅरेट सोन्याच्या १० ग्रॅमचा भाव जीएसटीसह १ लाख ४९ हजार ३५० रुपयांवर पोहोचला आहे. तर एक किलो चांदीचे दर जीएसटीसह २ लाख ८५० रुपयांवर आहेत.

२४ तासांत मोठी वाढ

गेल्या २४ तासांत सोन्याच्या दरात तब्बल ७ हजार रुपयांची तर चांदीच्या दरात १५ हजार रुपयांची वाढ झाली आहे. अमेरिकेचे अध्यक्ष डोनाल्ड ट्रम्प यांच्या मध्यावधी निवडणुकीतील पराभवाचा सोन्या-चांदीच्या दरावर परिणाम झाल्याची माहिती सराफ व्यावसायिकांनी दिली आहे. सलग दोन दिवस दर वाढत असल्याने धनत्रयोदशीला सोने खरेदी करणाऱ्यांना यंदा जास्त पैसे मोजावे लागणार आहेत.

स्रोत: मूळ बातमी