नाशिक महापालिकेतील दहा स्वीकृत नगरसेवक पदांसाठी अर्ज सादर करण्याची अंतिम मुदत बुधवारी दुपारी तीन वाजेपर्यंत आहे. मुदतीचा शेवटचा दिवस असल्याने शहरातील राजकीय वर्तुळात हालचालींना वेग आला आहे.
उच्च न्यायालयाने सहा आठवड्यांच्या आत ही प्रक्रिया पूर्ण करण्याचे आदेश दिल्यानंतर आयुक्त मनीषा खत्री यांनी गटनेत्यांची बैठक घेतली होती. सुरुवातीला २१ ऑक्टोबरपर्यंत मुदत देण्यात आली होती, मात्र ३१ ऑक्टोबरच्या ध्वजारोहण सोहळ्यामुळे ती ४ नोव्हेंबरपर्यंत वाढवण्यात आली.
दहा जागांचे वाटप कसे?
संख्याबळानुसार दहा जागांपैकी भाजपला सहा, शिवसेनेला दोन आणि शिवसेना (उबाठा)-काँग्रेस आघाडीला दोन जागांचा कोटा मिळाला आहे. एका जागेसाठी एकच अर्ज करता येणार आहे. अर्ज बाद झाल्यास संपूर्ण प्रक्रिया पुन्हा नव्याने करावी लागणार असल्याने सर्व पक्ष सावध पावले टाकत आहेत.
विरोधी गटातील दोन्ही जागांसाठी शिवसेनेने (उबाठा) आपली नावे जवळपास निश्चित केली आहेत. भाजपमध्ये सहा जागांसाठी शंभराहून अधिक इच्छुक असून, मुंबईत वरिष्ठ पातळीवर जोरदार लॉबिंग सुरू आहे. अंतिम यादी रात्री उशिरापर्यंत निश्चित होण्याची शक्यता आहे. तिन्ही विधानसभा मतदारसंघांत प्रत्येक आमदाराने एका नावाला पसंती दिल्याचे समजते.
काँग्रेसची नाराजी का?
स्वीकृत पदासाठी शिवसेना (उबाठा) सोबत गटनोंदणी केलेल्या काँग्रेसला दोनपैकी एक पद हवे आहे. त्यासाठी ठाकरे गटाशी दोन हात करण्याचीही तयारी असल्याचे सांगितले जाते. मात्र गटनोंदणीनुसार शिवसेना (उबाठा) गटनेत्यांचा निर्णय अंतिम राहणार असल्याने दोन्ही पक्षांतील युती तुटण्याची शक्यता व्यक्त केली जात आहे.
शिवसेनेच्या दोन नावांबाबतचा अंतिम निर्णय ठाण्यातून होणार असून, बुधवारी दुपारपर्यंत तिन्ही पक्षांचे गटनेते आयुक्तांकडे अर्ज सादर करणार आहेत. त्यानंतर आयुक्तांचा प्रस्ताव महासभेत जाईल आणि महापौर स्वीकृत नगरसेवकांची घोषणा करतील.
स्रोत: मूळ बातमी
Leave a Reply