मुंबईतील सेवा संस्थांच्या महापालिकेशी संबंधित सर्व प्रलंबित विषयांसंदर्भात येत्या १५ दिवसांत महापौर रितू तावडे आणि महापालिका आयुक्त अश्विनी भिडे यांच्याकडे संयुक्त बैठक घेतली जाईल, असे आश्वासन भाजप गटनेते व मुंबई बँकेचे अध्यक्ष आमदार प्रवीण दरेकर यांनी दिले आहे. मुंबईतील सेवा संस्थांतर्फे आयोजित दिवाळी स्नेहमेळाव्यात ते बोलत होते.
या स्नेहमेळाव्याला सहकारातील ज्येष्ठ नेते शिवाजीराव नलावडे, मुंबई बँकेचे उपाध्यक्ष सिद्धार्थ कांबळे, संचालक नंदकुमार काटकर यांच्यासह मजूर सहकारी संस्था व सेवा सहकारी संस्थांचे अनेक प्रतिनिधी उपस्थित होते. उपस्थितांना दिवाळीच्या शुभेच्छा देत दरेकर म्हणाले की, दरवर्षी नंदकुमार काटकर यांच्या नेतृत्वाखाली मुंबईतील बेरोजगार सहकारी संस्थांचे मेळावे होतात आणि एकत्र येऊन आपल्या समस्या चर्चेतून सोडवण्याच्या दृष्टीने वाटचाल करणे हा या मेळाव्यांचा उद्देश असतो.
ड वर्गात आणण्याचा प्रयत्न
आपले काही प्रश्न निकाली निघाले असून काही प्रश्न प्रलंबित आहेत, असे सांगत दरेकर यांनी येत्या काळात सेवा संस्थांना ड वर्गात आणण्याचा प्रयत्न निश्चित करू, असे आश्वासन दिले. त्याचबरोबर मुंबई महापालिकेशी संबंधित सर्व विषयांसंदर्भात मार्ग काढण्याचा प्रामाणिक प्रयत्न करू, असेही ते म्हणाले. याबाबत आपल्याकडे निवेदन द्या, महापौर आणि महापालिका आयुक्त यांना संयुक्त बैठक घेण्यास सांगेन व ही कामे कशी मिळतील यासाठी प्रयत्न करू, असेही आमदार दरेकरांनी आश्वस्त केले.
स्रोत: मूळ बातमी
Leave a Reply