नाशिक ते नासा: तीन शिक्षकांना अमेरिका दौऱ्याची संधी

नाशिक जिल्हा परिषदेच्या नाशिक ते नासा या अभिनव उपक्रमांतर्गत विद्यार्थ्यांसोबत शिक्षकांनाही अमेरिकेच्या दौऱ्याची संधी मिळणार आहे. इयत्ता सातवीतील विद्यार्थ्यांसाठी अमेरिकेतील नासा येथे शैक्षणिक अभ्यास भेट आयोजित केली जाणार असून, या दौऱ्यात सहभागी होण्यासाठी जिल्ह्यातील इच्छुक शिक्षकांमधून तीन शिक्षकांची निवड केली जाणार आहे.

विद्यार्थ्यांसोबत समन्वयासाठी शिक्षकांची निवड

विद्यार्थ्यांच्या या शैक्षणिक प्रवासात त्यांना योग्य मार्गदर्शन आणि सहकार्य मिळावे, यासाठी शिक्षकांचाही या दौऱ्यात समावेश करण्यात येणार आहे. जिल्हा परिषदेचे मुख्य कार्यकारी अधिकारी ओंकार पवार यांच्या संकल्पनेतून हा उपक्रम राबवला जात आहे. ग्रामीण विद्यार्थ्यांच्या स्वप्नांना जागतिक व्यासपीठ मिळवून देण्याच्या दिशेने हा उपक्रम महत्त्वाचा ठरेल, अशी माहिती प्राथमिक शिक्षणाधिकारी सरोज जगताप यांनी दिली आहे.

निवड होणाऱ्या तीन शिक्षकांपैकी किमान एक महिला शिक्षिका असणे आवश्यक आहे. संबंधित शिक्षक जिल्हा परिषदेच्या शाळेत कार्यरत असावा. तसेच परदेशातील या शैक्षणिक दौऱ्यासाठी स्वेच्छेने सहभागी होण्याची आणि विद्यार्थ्यांची संपूर्ण जबाबदारी स्वीकारण्याची तयारी असावी, ही अट घालण्यात आली आहे.

निवडीसाठीच्या अटी आणि अर्जाची मुदत

या दौऱ्यासाठी निवड होणाऱ्या शिक्षकाला इंग्रजी भाषेचे चांगले ज्ञान असणे आवश्यक आहे. तसेच तो शारीरिक आणि वैद्यकीयदृष्ट्या सक्षम असावा आणि त्याचे कमाल वय ४५ वर्षे असावे. संवाद कौशल्य, डिजिटल साक्षरता, वेळेचे आणि आपत्कालीन परिस्थितीचे व्यवस्थापन करण्याची क्षमता तसेच अडचणीच्या प्रसंगी योग्य निर्णय घेण्याचे कौशल्य असणे अपेक्षित आहे.

याशिवाय संबंधित शिक्षकाविरुद्ध कोणत्याही स्वरूपाची विभागीय किंवा खाते चौकशी नसावी आणि कोणत्याही पोलीस ठाण्यात त्याच्याविरुद्ध गुन्हा दाखल नसावा, या अटीही ठेवण्यात आल्या आहेत. या दौऱ्यासाठी अर्ज करण्याची मुदत ७ नोव्हेंबरपर्यंत आहे.

स्रोत: मूळ बातमी