जळगाव महापालिकेच्या आरोग्य विभागातील आरोग्य निरीक्षक रुपेश भालेराव हे कर्तव्य बजावत असताना त्यांना शिवीगाळ करून मारहाणीचा प्रयत्न झाल्याच्या निषेधार्थ भारतीय मजदूर संघाच्या महापालिका शाखेतर्फे सोमवारी सकाळी दहा वाजता महापालिकेच्या प्रवेशद्वाराजवळ आंदोलन करण्यात आले. त्यानंतर कर्मचाऱ्यांनी काळ्या फिती लावून आपला निषेध नोंदविला. त्यानंतर महापालिकेपासून शहर पोलिस ठाण्यापर्यंत पायी मोर्चा काढून संबंधितांविरुद्ध गुन्हा दाखल करण्याची मागणी करण्यात आली. यावेळी पोलिसांनी या प्रकरणी गुन्हा दाखल केला आहे.
नगरसेविकेच्या नातेवाईकांकडून शिवीगाळ झाल्याचा आरोप
महापालिकेतील स्वच्छता निरीक्षक रुपेश भालेराव हे कर्तव्य बजावत असताना एका नगरसेविकेच्या नातेवाईकांकडून त्यांना अर्वाच्य भाषेत शिवीगाळ करण्यात आली आणि मारहाणीचा प्रयत्न झाल्याचा आरोप आहे. या घटनेच्या निषेधार्थ संघटनेने कर्मचारी एकजुटीचे आवाहन केले होते. त्यानुसार सोमवारी सकाळी महापालिका प्रांगणात अधिकारी, कर्मचारी आणि संघटनेचे पदाधिकारी काळ्या फिती लावून एकत्र आले. यानंतर अतिरिक्त आयुक्त शोभा बाविस्कर आणि उपायुक्त निर्मला गायकवाड यांना निवेदन देऊन कर्मचाऱ्यांवरील हल्ले, धमक्या आणि शिवीगाळ रोखण्यासाठी प्रशासनाने ठोस भूमिका घ्यावी, तसेच कर्मचाऱ्यांना प्रशासकीय व कायदेशीर संरक्षण द्यावे, अशी मागणी करण्यात आली. त्यानंतर सुमारे २०० महापालिका कर्मचाऱ्यांचा मोर्चा शहर पोलिस ठाण्यावर धडकला. पोलिसांकडे तक्रार देत कारवाईची मागणी करण्यात आली आणि त्यानुसार गुन्हा दाखल करण्यात आला. या आंदोलनात सचिव गौरव पुराणिक, कार्याध्यक्ष समीर बोरोले यांच्यासह पदाधिकारी आणि मोठ्या संख्येने कर्मचारी सहभागी झाले.
कर्मचारी वैयक्तिक नोकर नाहीत, संघटनेची भूमिका
महापालिका कर्मचारी कोणाचेही वैयक्तिक नोकर नसून कायद्याच्या चौकटीत काम करणारे जनतेचे सेवक आहेत. त्यांच्या सन्मानाशी आणि सुरक्षिततेशी तडजोड केली जाणार नाही, अशी भूमिका संघटनेचे अध्यक्ष गौरव सपकाळे यांनी मांडली. कर्मचाऱ्यांच्या सुरक्षेसाठी स्वतंत्र धोरण आणि कार्यपद्धती लागू करण्याची मागणीही यावेळी करण्यात आली.
स्रोत: मूळ बातमी
Leave a Reply