लोकप्रिय मालिकेच्या १ नोव्हेंबरच्या भागात सायली, अर्जुन आणि निरीक्षक सावंत महिपतच्या प्रकरणावर चर्चा करताना दिसतात. महिपत स्वतःला सोडवण्यासाठी सर्व आरोप सचिनवर ढकलत असल्याचा संशय त्यांना आला आहे. त्याच वेळी निरीक्षकांना फोन येतो की अर्जुनला ज्या क्रमांकावरून फोन आला होता, त्याचे ठिकाण शोधून काढले आहे. ते तातडीने तिकडे निघतात.
चिठ्ठीतून मिळालेली माहिती
दुसऱ्या दिवशी अर्जुन आणि सायली सचिनला कसे पकडायचे याचा विचार करत असतात. त्यांच्या मागे श्वेता उभी असते. तिला सचिनला फोन करून सावध करायचे असते, पण सायली आणि अर्जुन बाहेरच असल्याने तिला फोन करता येत नाही. तितक्यात प्रियाच्या एका माणसाने अर्जुनच्या दिशेने गुपचूप एक चिठ्ठी फेकली. त्यात लिहिले होते की काल तुम्ही ज्या पत्त्यावर गेला होतात, तिथेच सचिन अजूनही लपला आहे. काल तो सावध झाल्याने सापडला नाही, पण आज गेल्यास नक्की सापडेल. सोबत त्या बंगल्याचा फोटोही होता. श्वेता ते पाहते आणि बंगला ओळखते. काहीतरी गडबड असल्याचे तिच्या लक्षात येते आणि सचिनला सावध करावेच लागेल, असे तिला वाटते.
सायलीची कोर्टातील लढाई
सायली आणि अर्जुन आत जात असताना सायलीची तब्येत अचानक बिघडते. घरातील सर्वजण तिची काळजी घेतात, पण खटला लढवायचाच असल्याचे ती ठामपणे सांगते. वेगाने चालल्यामुळे पोटात थोडे दुखल्याचे ती सांगते आणि अर्जुनला तातडीने ठिकाणावर जायला सांगते. दुसरीकडे प्रिया राकेशशी फोनवर बोलते. श्वेताचे फोन कोणीही उचलू नयेत, अशी तंबी ती देते. कारण श्वेताला डाव कळल्यास ती सचिनला सावध करेल. कोणाच्यातरी अंगावर आरोप टाकून महिपतला बाहेर काढायचा डाव होता, पण त्यात सचिनच अडकला आहे, कारण सध्या सर्व पुरावे त्याच्याविरोधात आहेत, असे प्रिया सांगते. फोन ठेवल्यानंतर प्रियालाही पोटात दुखू लागते.
पेन ड्राईव्हचा पुरावा
सायली कोर्टात जाण्याची पूर्ण तयारी करते. देवीला प्रार्थना करताना ती म्हणते की ही लढाई फक्त तिच्या सुटकेपुरती नाही, तर तिच्या लेकींसाठीही आहे. प्रताप तिला आशीर्वाद देतो. दरम्यान, श्वेता आईची तब्येत बिघडल्याचे कारण सांगून तातडीने बाहेर पडते. सायलीला तिच्यावर संशय येतो, कारण श्वेताने आईशी संपर्कात असल्याचे कधी सांगितले नव्हते. श्वेता सारवासारव करते की नवऱ्याच्या त्रासामुळे तिने आईला हे सांगितले होते आणि त्याचाच तणाव घेतल्याने आईची तब्येत बिघडली असावी. बाहेर पडल्यावर श्वेता सचिनला सतत फोन करते. तो झोपलेला असतो. जाग आल्यावर तो विचारतो की इतके फोन का केले, तेव्हा श्वेता त्याला सावध करते की अर्जुन आणि चैतन्य कधीही त्याच्या दाराशी पोहोचतील. त्याच वेळी अर्जुन आणि चैतन्य तिथे पोहोचतात आणि सचिन सावध होतो. कोर्टात सुनावणी सुरू झाल्यावर विरोधी पक्षाचे वकील आरोप करतात की सचिन हा सायलीच्या नणंदेचा नवरा आहे, त्यामुळे दोघांनी मिळून डाव रचला असावा. सायली ठाम नकार देते आणि म्हणते की आतापर्यंत सचिन गुन्हेगार असू शकतो असे मानले जात होते, पण आज ती असा पुरावा दाखवणार आहे ज्यातून सचिन हाच तस्करी प्रकरणातील सूत्रधार असल्याचे सिद्ध होईल. त्यासाठी ती न्यायाधीशांसमोर सापडलेला पेन ड्राईव्ह सादर करते, ज्यामध्ये मुलींची सर्व माहिती आणि त्यांच्या सौद्याची नोंद आहे.
स्रोत: मूळ बातमी
Leave a Reply