तिळाची चटणी: कमी साहित्यात झटपट तयार होणारी खमंग रेसिपी

भाजी-चपाती किंवा भाकरी खाताना ताटात काहीतरी चुकल्यासारखे वाटते का? ती राहिलेली गोष्ट म्हणजे चटणी. ताटाच्या छोट्या कोपऱ्यात असली तरी तिच्या चवीमुळे जेवण पूर्ण झाल्यासारखे वाटते. मात्र चटण्या बनवायचा कंटाळा, सोलणे, ठेचणे, वाटणे हे सगळे कोण करेल, असे वाटते. अशा वेळी तिळाची चटणी हा सर्वात सोपा पर्याय आहे. कमी साहित्यात आणि कमी कष्टात ती झटपट तयार होते.

लागणारे साहित्य

पांढरे तीळ – १ वाटी किंवा १ कप, शेंगदाणे – अर्धी वाटी, किसलेले सुके खोबरे – पाव वाटी, लसूण पाकळ्या – १० ते १२, जिरे – १ छोटा चमचा, लाल तिखट – १ ते २ मोठे चमचे आणि चवीनुसार मीठ.

कृती

सर्वप्रथम कढईमध्ये मंद आचेवर तीळ खमंग आणि खरपूस भाजून घ्या. तीळ जास्त भाजू नका, नाहीतर ते जळतील आणि चटणीची चव कडू होईल. भाजून झाले की ते एका ताटात काढून पूर्णपणे थंड होऊ द्या. त्याच कढईत शेंगदाणे कुरकुरीत होईपर्यंत भाजून घ्या. त्यानंतर त्यात किसलेले सुके खोबरे आणि जिरे घालून थोडे परतून घ्या.

भाजलेले सर्व घटक म्हणजे तीळ, शेंगदाणे, खोबरे आणि जिरे एका ताटात काढून नीट थंड करून घ्या. मिक्सरच्या भांड्यात थंड झालेले सर्व साहित्य, लसूण पाकळ्या, लाल तिखट आणि चवीनुसार मीठ टाका. मिक्सरला फार बारीक पेस्ट न करता, थोडे जाडसर वाटून घ्या. पाट्यावर वाटलंत तर एकदम उत्तम. तुमची खमंग तिळाची सुकी चटणी तयार आहे. ही चटणी तुम्ही भाकरी, चपाती किंवा गरम भातासोबत खाऊ शकता.

स्रोत: मूळ बातमी