सी. के. नायडू चषक: ऋषिकेशचे सहा, रोहनचे तीन बळी

भारतीय क्रिकेट नियामक मंडळाच्या २३ वर्षांखालील कर्नल सी. के. नायडू चषक स्पर्धेत सोलापूर येथे महाराष्ट्र आणि रेल्वे यांच्यात झालेला चार दिवसीय सामना नाशिकच्या दोन जलदगती गोलंदाजांमुळे चर्चेत राहिला. दोन्ही संघांकडून खेळणाऱ्या नाशिककर गोलंदाजांनी भेदक मारा केला.

महाराष्ट्राकडून खेळताना नाशिकचा जलदगती गोलंदाज ऋषिकेश कातकाडे याने रेल्वेच्या पहिल्या डावात एकूण सहा बळी घेतले. पहिल्या दिवशी चार आणि दुसऱ्या दिवशी आणखी दोन बळी घेत त्याने ही कामगिरी केली. २२ षटकांत पाच निर्धाव षटके टाकत त्याने ८८ धावा देत सहा फलंदाज बाद केले.

ऋषिकेशची कामगिरीही महाराष्ट्राला वाचवू शकली नाही

ऋषिकेशच्या भेदक मार्यानंतरही रेल्वेने ९ बाद ४५१ धावांचा डोंगर उभारला. उत्तरादाखल महाराष्ट्राचा पहिला डाव अवघ्या १३४ धावांत संपला. फॉलोऑननंतर दुसऱ्या डावातही महाराष्ट्राचे फलंदाज केवळ १४० धावांपर्यंत मजल मारू शकले.

पदार्पणात रोहनची छाप

दुसरीकडे रेल्वेकडून पदार्पण करणाऱ्या नाशिकच्या डावखुऱ्या जलदगती गोलंदाज रोहन शेडगे याने सामन्यात एकूण तीन बळी घेतले. पहिल्या डावात दोन आणि दुसऱ्या डावात एक बळी घेत त्याने रेल्वेच्या एक डाव आणि १७७ धावांच्या मोठ्या विजयात मोलाचा हातभार लावला.

स्रोत: मूळ बातमी