स्लीव्हलेस कपडे घालायचे असोत किंवा एखादा खास ड्रेस, प्रत्येकाला आपली काख स्वच्छ आणि मऊ दिसावी असे वाटते. मात्र घाईत केलेल्या शेव्हिंगमुळे किंवा योग्य काळजी न घेतल्यामुळे काखेची त्वचा कधी कधी काळी पडते किंवा खडबडीत होते. त्यामुळे अनेकांना स्लीव्हलेस कपडे घालण्यास संकोच वाटतो. त्वचारोगतज्ज्ञांनी सांगितलेले काही सोपे उपाय यावर उपयुक्त ठरू शकतात.
स्वच्छता आणि एक्सफोलिएशन महत्त्वाचे
त्वचारोगतज्ज्ञांच्या मते अंडरआर्म्स मऊ ठेवण्यासाठी त्वचा स्वच्छ करणे आणि त्यावरील मृत पेशी काढून टाकणे, म्हणजेच एक्सफोलिएशन करणे, महत्त्वाचे आहे. यासाठी ६ ते १२ टक्के लॅक्टिक ऍसिड असलेले बॉडी लोशन वापरता येते. लॅक्टिक ऍसिड त्वचेच्या वरच्या थरावर साचलेल्या मृत पेशी दूर करण्यास मदत करते, त्यामुळे त्वचा आधीपेक्षा अधिक मऊ आणि नितळ दिसते.
चेहरा, हात आणि पाय यांची काळजी घेतली जाते, पण काखेकडे अनेकदा दुर्लक्ष होते, असेही तज्ज्ञांचे म्हणणे आहे. दिवसातून किमान एकदा काखेला हलके बॉडी लोशन किंवा मॉइश्चरायझर लावावे. त्यामुळे त्वचा ओलसर आणि मऊ राहण्यास मदत होते.
शेव्हिंग करताना घ्यायची काळजी
रेझर वापरत असाल तर कधीही ड्राय शेव्हिंग करू नये, कारण त्यामुळे त्वचेचा पोत खडबडीत होऊ शकतो. शेव्हिंग करण्यापूर्वी हलका बॉडी वॉश किंवा शेव्हिंग जेल लावावे, त्यानंतर केसांच्या दिशेने हळुवारपणे शेव्हिंग करावे. शेव्हिंगनंतर त्वचा पाण्याने स्वच्छ धुवून मॉइश्चरायझर लावावे. वारंवार शेव्हिंग केल्याने त्वचा कोरडी होऊ शकते किंवा त्यावर लहान डाग राहू शकतात. अशा वेळी लेझर हेअर रिडक्शनचा पर्याय विचारात घेता येतो, ज्यामुळे वारंवार शेव्हिंगची गरज कमी होते. कोणतेही घरगुती उपाय करण्यापूर्वी डॉक्टरांचा सल्ला घेणे योग्य ठरते, कारण काही पदार्थांमुळे त्वचेला अॅलर्जी होऊ शकते.
स्रोत: मूळ बातमी
Leave a Reply