भुसावळ येथील रेल्वे मैदानावर जळगाव जिल्हा पोलिस दलाच्या वतीने आयोजित पोलिस भरतीपूर्व प्रशिक्षण शिबिराला उत्स्फूर्त प्रतिसाद मिळाला. भुसावळ उपविभागासह परिसरातील ६००हून अधिक इच्छुक तरुण-तरुणींनी या शिबिरात सहभाग घेतला. गुरुवारी झालेल्या या शिबिरात उमेदवारांना भरती प्रक्रियेची अचूक माहिती थेट प्रात्यक्षिकांतून देण्यात आली.
मैदानी चाचणीचे थेट प्रात्यक्षिक
वस्त्रोद्योगमंत्री संजय सावकारे आणि पोलिस अधीक्षक श्रीकांत धिवरे यांच्या संकल्पनेतून हे शिबिर आयोजित करण्यात आले होते. अपर पोलिस अधीक्षक संदीप गावित आणि भुसावळचे उपविभागीय पोलिस अधिकारी केदार बारबोले यांच्या मार्गदर्शनाखाली शिबिर पार पडले. यात अधिकृत पोलिस भरती नियमांनुसार उमेदवारांची उंची आणि छाती कशी मोजली जाते, याचे थेट प्रात्यक्षिक दाखवून उमेदवारांच्या शंकांचे निरसन करण्यात आले. छाती न फुगवता आणि फुगवून कशी मोजतात, हेही समजावून सांगण्यात आले. मैदानी चाचणीत पूर्ण गुण मिळविण्यासाठी गोळा कसा धरावा, फेकताना शरीराचा समतोल कसा ठेवावा आणि फाऊल कसा टाळावा, याचे अचूक तंत्रशुद्ध प्रात्यक्षिक करून दाखविण्यात आले.
कागदपत्रे आणि लेखी परीक्षेची तयारी
भरती प्रक्रियेदरम्यान आवश्यक असणारे अधिवास प्रमाणपत्र, जात प्रमाणपत्र, नॉन-क्रिमिलीयर आणि शैक्षणिक कागदपत्रे वेळेत पूर्ण करण्याबाबत सविस्तर सूचना देण्यात आल्या. लेखी परीक्षेतील सामान्यज्ञान, बुद्धिमत्ता, गणित आणि मराठी व्याकरण या विषयांची तयारी, वेळेचे व्यवस्थापन आणि मैदानी चाचणीसाठी शारीरिक तंदुरुस्ती राखण्याबाबतही मार्गदर्शन करण्यात आले. आजची तयारी, उद्याचा पोलिस अधिकारी या उद्देशाने ग्रामीण आणि शहरी भागातील भावी उमेदवारांना भरतीप्रक्रियेची अचूक माहिती मिळावी आणि त्यांचा आत्मविश्वास वाढावा, यासाठी या शिबिराचे आयोजन होते. या शिबिरासाठी भुसावळ उपविभागातील पोलिस अधिकारी आणि कर्मचाऱ्यांनी पुढाकार घेतला.
स्रोत: मूळ बातमी
Leave a Reply