गोड खात नाही तरी साखर वाढते? कारणे जाणून घ्या

गोड पदार्थ खात नाही, साखरही घेत नाही, तरीही रक्तातील साखर वाढलेली दिसते, अशी तक्रार अनेकजण करतात. केवळ गोड खाण्यामुळेच साखर वाढते, असे नाही. शरीरातील काही नैसर्गिक प्रक्रिया, मानसिक स्थिती आणि आजारपण यांचाही रक्तातील साखरेवर परिणाम होतो, असे डॉक्टरांनी स्पष्ट केले आहे.

पहाटे साखर वाढण्यामागचे कारण

काही लोकांची सकाळी उठल्यानंतर रक्तातील साखर वाढलेली असते. याला डॉन फेनॉमेनन असे म्हणतात. पहाटेच्या वेळी शरीरातील काही संप्रेरकांचे प्रमाण वाढते. त्यामुळे यकृतातून रक्तात साखर सोडली जाते आणि रक्तातील साखर वाढू शकते. त्यामुळे सकाळच्या वेळी साखर जास्त दिसणे हे केवळ खाण्याशी संबंधित नसते.

ताण, आजारपण आणि औषधांचा परिणाम

जास्त मानसिक ताण, चिंता किंवा सतत विचार करत राहणे याचाही रक्तातील साखरेवर परिणाम होतो. तणावामुळे शरीरातील काही संप्रेरके वाढतात आणि त्यातून साखर वाढू शकते. त्याचबरोबर सर्दी, ताप किंवा शरीरातील कोणताही संसर्ग झाल्यासही साखर वाढू शकते. आजारपणात शरीरात बदल होतात आणि इन्सुलिन योग्य प्रकारे काम करत नाही. पाण्याचे प्रमाण कमी होणे आणि काही औषधांचा परिणाम यामुळेही रक्तातील साखर वाढू शकते. त्यामुळे साखर वारंवार वाढत असल्यास डॉक्टरांचा सल्ला घेणे महत्त्वाचे आहे.

स्रोत: मूळ बातमी