बुलढाण्याचे शिंदे गटाचे आमदार संजय गायकवाड शेतकऱ्यांच्या आत्महत्येबाबत केलेल्या वादग्रस्त वक्तव्यामुळे अडचणीत आले आहेत. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे हेही त्यांच्या वक्तव्यामुळे नाराज असल्याचे सांगितले जात आहे. या पार्श्वभूमीवर गायकवाड यांच्यावर पक्षातून निलंबनाची कारवाई करण्याचे आदेश शिंदे यांनी दिल्याची माहिती समोर आली आहे.
नेमके काय म्हणाले होते गायकवाड?
शेतकऱ्यांच्या आत्महत्यांबाबत बोलताना गायकवाड म्हणाले होते की शेतकरी कुटुंबाला वाऱ्यावर सोडून आत्महत्या करतो. त्याला काही अडचण असेल तर त्याने आमदार, खासदारांना पत्र पाठवावे आणि सर्वजण मिळून त्याला मदत करतील. आपल्या भाषणात नेहमी सांगतो की शेतकरी कोणताही विचार न करता आत्महत्या करतात, आणि जर कोणत्याही शेतकऱ्याने जीव दिला तर त्याच्या मयतीलाही कुणी जाऊ नये, असेही ते म्हणाले होते. या वक्तव्यामुळे त्यांच्यावर टीकेची झोड उठली आहे. वाद वाढल्यानंतर स्पष्टीकरण देताना गायकवाड यांनी आपले वक्तव्य शेतकऱ्यांसाठी नसून अमली पदार्थांच्या आहारी गेलेल्या तरुणांच्या संदर्भात असल्याचा दावा केला. तरीही त्यांच्या वक्तव्यामुळे राजकीय वर्तुळातून प्रचंड संताप व्यक्त केला जात आहे.
पक्षाची कोंडी आणि पुढील कारवाईकडे लक्ष
शेतकरी आपले अन्नदाता असून त्यांच्याविरोधातील कोणतीही अवमानकारक विधाने खपवून घेतली जाणार नाहीत, असा इशारा देत शिंदे यांनी गायकवाड यांचे शिवसेनेतून निलंबन करण्याचे आदेश दिल्याची माहिती सूत्रांकडून देण्यात आली आहे. शिंदे यांच्या शिवसेनेकडून शेतकऱ्यांच्या मदतीसाठी विविध उपक्रम राबवले जातात. दुष्काळग्रस्त भागातील शेतकरी कुटुंबांसाठी शिलाई मशीन, शेतकऱ्यांच्या मुलींसाठी सायकलींचे वाटप केले जाते. शिवसेनेच्या वतीने दुष्काळग्रस्त भागात अन्नधान्याचे 100 ट्रकही मदतीसाठी पाठवण्यात आल्याचा दावा पक्षाकडून केला जात आहे. मात्र गायकवाड यांच्या वक्तव्याने पक्षाची प्रतिमा मलिन होत असल्याची भावना नेते आणि कार्यकर्त्यांकडून व्यक्त केली जात आहे. निलंबनाच्या कारवाईबाबत अद्याप पक्षाकडून अधिकृत पत्रकार परिषद किंवा प्रसिद्धीपत्रकाद्वारे औपचारिक घोषणा करण्यात आलेली नाही. त्यामुळे शिंदे नेमकी कोणती भूमिका घेतात आणि गायकवाड यांच्यावर निलंबनाची कारवाई होते का, याकडे राजकीय वर्तुळाचे लक्ष लागले आहे.
स्रोत: मूळ बातमी
Leave a Reply