वर पाहून परतताना भीषण अपघात; तिघांचा मृत्यू

मुलीच्या आयुष्यातील नव्या पर्वाची स्वप्ने डोळ्यांत घेऊन भावी वराला पाहण्यासाठी गेलेल्या कुटुंबावर काळाने घाला घातला. तिसगाव-ढंढाणे (ता. धुळे) येथील राजू माने, त्यांच्या पत्नी बालाबाई आणि मुलगी भटाबाई यांचा बुधवारी (ता. २९) सायंकाळी साडेसहाच्या सुमारास टिंगरीजवळील वनपट फाटा परिसरात झालेल्या भीषण अपघातात मृत्यू झाला. या घटनेने तिसगावसह पंचक्रोशीत शोककळा पसरली आहे.

अपघात कसा झाला

राजू माने पत्नी आणि मुलीसह नांदगाव येथे मुलीसाठी वर पाहण्यासाठी गेले होते. तेथून दहिदीमार्गे कुसुंबा येथे परत येत असताना टिंगरी शिवारातील वनपट फाटा परिसरात त्यांच्या दुचाकीला अपघात झाला. धडक देणाऱ्या पिकअपचा चालक दुसऱ्या वाहनाला ओव्हरटेक करत असताना समोरून येणाऱ्या माने कुटुंबाच्या वाहनाला जोरदार धडक दिल्याची प्राथमिक माहिती आहे. धडकेची तीव्रता इतकी होती की क्षणात होत्याचे नव्हते झाले.

गावावर शोककळा

मुलीच्या आयुष्यात सुखाचा नवा अध्याय सुरू व्हावा यासाठी तिच्या संसाराची स्वप्ने आई-वडिलांनी पाहिली होती; मात्र ती क्षणार्धात उध्वस्त झाली. या भीषण अपघाताची माहिती सोशल मीडियातून नातेवाईकांना समजली आणि त्यानंतर त्यांनी तिसगाव-ढंढाणे येथे कळविले. घटनेचे वृत्त समजताच ग्रामस्थ, नातेवाईक आणि मित्रपरिवारातून तीव्र दुःख व्यक्त करण्यात आले असून संपूर्ण परिसर शोकाकुल झाला आहे.

स्रोत: मूळ बातमी