सिंहस्थ कुंभमेळ्यानिमित्त राष्ट्रपती द्रौपदी मुर्मू यांना आमंत्रित करण्यात आले असून, त्यांनी आमंत्रण स्वीकारून त्र्यंबकेश्वरला येण्याचे जाहीर केले आहे. त्यामुळे त्र्यंबकवासीयांना अत्यानंद झाला आहे. त्यांच्या आगमन सोहळ्याची आणि ध्वजारोहणाची तयारी पूर्ण झाली आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांच्यासह विविध मान्यवर त्र्यंबकेश्वरला येत आहेत.
त्र्यंबकेश्वरमध्ये दहा शैव आखाड्यांचे साधु-महंत आणि ठाणापती यांच्या प्रमुख उपस्थितीत ध्वजारोहण सोहळा कुशावर्त तीर्थावर होत आहे. कुंभमेळामंत्री गिरीश महाजन, आमदार, खासदार, स्थानिक नगरसेवक आणि प्रशासन अधिकारी यांच्या प्रमुख उपस्थितीत हा सोहळा पार पडेल.
शुक्रवारी भव्य शोभायात्रा
३१ ऑक्टोबरच्या ध्वजारोहण सोहळ्याच्या निमित्ताने शुक्रवारी, ३० ऑक्टोबर रोजी त्र्यंबकेश्वर शहरातून भव्य शोभायात्रा निघणार आहे. कुशावर्त तीर्थापासून त्र्यंबकराज मंदिर आणि पालिकेपर्यंत ही शोभायात्रा असेल. दुपारी चार वाजता शोभायात्रेला प्रारंभ होईल. त्यानंतर सर्वांनी स्नेहभोजनाचा लाभ घ्यावा, असे आवाहन करण्यात आले आहे. शोभायात्रेत पारंपरिक वाद्ये आणि आदिवासी नृत्य असेल. कुशावर्त तीर्थावर शंखनादही होणार आहे.
स्थानिकांच्या मदतीसाठी पाठपुरावा
त्र्यंबकेश्वर पालिकेने ग्रामसभा घेऊन काही ठराव पारित केले आहेत. त्या ठरावांची पूर्तता करण्यासाठी मुख्यमंत्री फडणवीस आणि उपमुख्यमंत्री शिंदे यांच्याकडे पाठपुरावा केला जाणार आहे. दर्शनपथाच्या कामानिमित्त स्थानिकांची घरे आणि व्यावसायिकांचे गाळे पाडल्यामुळे त्यांच्या रोजगाराचा प्रश्न निर्माण झाला आहे. शासनाने नुकसानग्रस्त कुटुंबीयांना मदत करावी, अशी विनंती करण्यात आली आहे. उपमुख्यमंत्री शिंदे यांनी नुकतीच त्र्यंबकेश्वरला भेट देऊन साधु-महंतांचे आशीर्वाद घेतले आणि स्थानिकांना मदतीचे आश्वासन दिले. त्यांच्याकडून मदतीची अपेक्षा त्र्यंबकवासीयांना आहे.
सिंहस्थ कुंभमेळ्यानिमित्त शहराच्या विकासात भर पडत आहे. दर्शनपथाची कामे प्रगतिपथावर आहेत. मंदिर परिसरातील शासकीय रुग्णालय, पंचायत समिती आणि तहसील कार्यालय पाडले असून, उर्वरित कामे सुरू आहेत. त्र्यंबकेश्वरला नवीन रुग्णालय मिळणार आहे. सर्व शासकीय कार्यालये एकाच ठिकाणी येत असल्याने त्या इमारतीचे काम जोमाने सुरू आहे. तंत्रज्ञानाचा पुरेपूर वापर करणारा हा २०२७ चा सिंहस्थ देश-विदेशातील भाविकांसाठी संस्मरणीय ठरेल, असा विश्वास व्यक्त करण्यात आला आहे.
स्रोत: मूळ बातमी
Leave a Reply