मुंबईतील पवई तलावाच्या गणेश घाटावर उभारण्यात आलेल्या अत्याधुनिक म्युझिकल फाउंटनचे उद्घाटन रविवारी सायंकाळी करण्यात आले. या फाउंटनमुळे पवई तलावाच्या सौंदर्यात भर पडली असून, तो मुंबईतील नवे पर्यटन आकर्षण म्हणून विकसित करण्यात आला आहे.
उद्घाटन मंत्री मंगल प्रभात लोढा यांच्या हस्ते झाले. या वेळी मुंबई उपनगरचे जिल्हाधिकारी सौरभ कटियार, म्हाडाच्या स्लम बोर्डाचे मुख्य अधिकारी सतीश भारतीय यांच्यासह म्हाडा आणि महानगरपालिकेचे अधिकारी उपस्थित होते.
शिवरायांचा पराक्रम प्रकाश-ध्वनी शोच्या रूपात
सुमारे १८० मीटर लांबीचा हा म्युझिकल फाउंटन देशातील सर्वात मोठ्या फाउंटन्सपैकी एक ठरणार आहे. छत्रपती शिवाजी महाराजांचा पराक्रम, मराठ्यांचा देदीप्यमान इतिहास, महाराष्ट्राची संतपरंपरा, संस्कृती आणि मुंबईचा गौरवशाली वारसा आधुनिक तंत्रज्ञानाच्या माध्यमातून या शोमध्ये सादर केला जाणार आहे.
या प्रकल्पात जागतिक दर्जाचा मल्टिमीडिया लाईट अँड साउंड शो साकारण्यात आला आहे. संगीतमय कारंजे, वॉटर स्क्रीन आणि फायर जेट्स यांचा त्यात समावेश आहे. विशेष दृश्य परिणामांच्या माध्यमातून तीन वेगवेगळे चित्रपट सादर केले जाणार असून, प्रेक्षकांना इतिहास, संस्कृती आणि वारशाचे दर्शन घडणार आहे.
तलावाच्या स्वच्छतेलाही मदत
मंत्री लोढा म्हणाले की, मुंबईकरांसह देश-विदेशातील पर्यटकांनी या शोचा आनंद घ्यावा. पवई तलावाचे नैसर्गिक सौंदर्य जपण्याबरोबरच त्याच्या स्वच्छतेसाठीही विशेष प्रयत्न केले जातील, असे त्यांनी स्पष्ट केले.
या फाउंटनचे आणखी एक वैशिष्ट्य म्हणजे पाण्याचे एरेशन. या प्रक्रियेमुळे दररोज सुमारे ३० लाख लिटर पाण्यात हवा मिसळण्यास मदत होणार असून, पाण्यातील विरघळलेल्या ऑक्सिजनचे प्रमाण वाढण्यास हातभार लागू शकतो. बाष्पीभवनामुळे परिसरात थंडावा निर्माण होणे आणि स्थानिक तापमानात घट होणे असे पर्यावरणीय फायदेही अपेक्षित आहेत.
उद्घाटनानंतर म्युझिकल फाउंटनचा पहिला शो पाहण्यासाठी नागरिकांनी मोठी गर्दी केली होती. आधुनिक तंत्रज्ञान, इतिहास आणि मनोरंजनाचा संगम असलेला हा प्रकल्प मुंबईच्या पर्यटन नकाशावर पवई तलावाला नवे स्थान मिळवून देणारा ठरेल, अशी अपेक्षा व्यक्त केली जात आहे.
Leave a Reply