मुंबई शहरात अमली पदार्थांच्या तस्करीचे प्रमाण वाढत असताना त्यावर नियंत्रण मिळवण्यासाठी मुंबई पोलिसांनी एक महत्त्वाचे पाऊल उचलले आहे. अँटी-नार्कोटिक्स सेलसाठी तयार करण्यात आलेली अत्याधुनिक व्हॅन आता पोलिसांच्या ताफ्यात दाखल झाली असून, ती आजपासून कार्यान्वित होत आहे.
गेल्या काही महिन्यांपासून मुंबईत ड्रग्ज तस्करांचा सुळसुळाट वाढला आहे. पोलिसांकडून मोठ्या प्रमाणावर कारवाया सुरू असतानाही अनेक गंभीर प्रकरणे उघडकीस येत आहेत. या पार्श्वभूमीवर ड्रग्जचे सेवन करणाऱ्यांना शोधण्यासाठी ही नवी व्हॅन उपयुक्त ठरणार आहे.
पाच मिनिटांत चाचणीचा निकाल
या व्हॅनमधील प्रणालीमुळे एखाद्या व्यक्तीने अमली पदार्थांचे सेवन केले आहे का, आणि केले असल्यास कोणत्या प्रकारच्या पदार्थाचे सेवन केले आहे, हे अवघ्या पाच मिनिटांत समजणार आहे. महालक्ष्मी रेसकोर्स येथे होणाऱ्या एका कार्यक्रमाच्या निमित्ताने ही व्हॅन तिथे तैनात करण्यात आली आहे.
कारवाईदरम्यान घटनास्थळी पंचनामा करणे, चित्रीकरण करणे आणि पुरावे गोळा करणे या सर्व गोष्टी एकाच ठिकाणी करता येणार आहेत. गोळा केलेले पुरावे सुरक्षित आणि विश्वासार्ह अवस्थेत राहावेत यासाठी ब्लॉकचेन तंत्रज्ञानाचा वापर केला जाणार आहे. गुन्हा दाखल झाल्यापासून आरोपपत्र दाखल होईपर्यंतच्या प्रक्रियेवर ‘तपास सारथी’ प्रणालीच्या मदतीने लक्ष ठेवता येणार आहे.
मुख्यमंत्र्यांच्या हस्ते लोकार्पण
देशात पहिल्यांदाच तयार करण्यात आलेल्या या अँटी-नार्कोटिक्स व्हॅनचे लोकार्पण राज्याचे मुख्यमंत्री देवेंद्र फडणवीस यांच्या हस्ते करण्यात आले. सायबर गुन्हे, समाजमाध्यमे आणि डार्क नेटच्या माध्यमातून होणाऱ्या गुन्हेगारीचे स्वरूप बदलत असताना तपासात आधुनिक तंत्रज्ञानाचा वापर वाढवण्यावर या सुविधेमुळे भर दिला जाणार आहे. अमली पदार्थांविरोधातील कारवाईपासून ते पुरावे सुरक्षित ठेवण्यापर्यंतच्या प्रक्रियेत या तंत्रज्ञानाचा उपयोग होईल, असे मुख्यमंत्र्यांनी सांगितले. अनुचित प्रकार रोखण्यासाठी आणि तरुणांमध्ये जरब बसवण्यासाठी ही व्हॅन उपयोगी ठरेल, असेही ते म्हणाले.
Leave a Reply