मुंबईतील विविध नागरी प्रश्नांवरून शिवसेना (उद्धव बाळासाहेब ठाकरे) पक्षाच्या नेत्या आणि मुंबईच्या माजी महापौर किशोरी पेडणेकर यांनी महापालिका प्रशासनावर जोरदार टीका केली आहे. मंडपेश्वर शाळेच्या जागेचा बिल्डरकडून वापर होत असल्याचा आरोप करत त्यांनी अधिकाऱ्यांच्या कामकाजावर प्रश्नचिन्ह उपस्थित केले. त्याचबरोबर मुंबईतील वाढते प्रदूषण रोखण्यासाठी महापालिकेने आखलेल्या रस्ते धुण्याच्या नियोजनालाही त्यांनी विरोध दर्शवला.
मंडपेश्वर शाळेच्या जागेवरून प्रशासनाला सवाल
मंडपेश्वर येथील शाळेच्या जागेचा बिल्डरकडून वापर केला जात असल्याचा आरोप पेडणेकर यांनी केला. या ठिकाणी भेट दिल्यानंतर तिथली परिस्थिती पाहायला मिळाली. शाळेतील मुलांना जाण्यासाठी असलेला रस्ताही बिल्डरच्या वापरासाठी खुला असल्याचे त्यांनी सांगितले. भेट दिल्यानंतर अवघ्या पाच तासांत संबंधित परिसर स्वच्छ करण्यात आला. मात्र, अनेक महिन्यांपासून या जागेचा वापर होत असताना संबंधितांवर काय कारवाई करण्यात आली, असा सवाल त्यांनी उपस्थित केला. महापालिकेचे अधिकारी या ठिकाणी पाहणी करत नाहीत का आणि स्थानिक लोकप्रतिनिधी व खासदारांचेही याकडे लक्ष नाही का, असा प्रश्न त्यांनी विचारला. केवळ नावापुरती झाडे लावून प्लॉट दाखवणे आणि प्रत्यक्षात जागेचा वेगळाच वापर करणे हा अधिकाऱ्यांच्या संगनमताने झालेला भ्रष्टाचार असल्याचा आरोपही त्यांनी केला.
श्वेतपत्रिकेची मागणी
मुंबईच्या विकासकामांवरून पेडणेकर यांनी सत्ताधाऱ्यांना लक्ष्य केले. गेल्या चार वर्षांतील कामकाजाचा हिशेब जनतेसमोर मांडण्यासाठी श्वेतपत्रिका काढण्याची मागणी त्यांनी केली. उद्धव ठाकरे यांच्या नेतृत्वाखालील सरकारने काय केले आणि महायुती सरकारने काय केले, हे मुंबईकरांना समजले पाहिजे, असे त्या म्हणाल्या. यापूर्वीही श्वेतपत्रिकेची मागणी करण्यात आली होती. आता तरी प्रशासनाने सर्व तारखांसह कामांचा तपशील जाहीर करावा, अशी भूमिका त्यांनी मांडली.
रस्ते धुण्यासाठी २३३ टँकरचा प्लॅन चुकीचा
मुंबईतील प्रदूषण रोखण्यासाठी महापालिकेने आखलेल्या रस्ते धुण्याच्या नियोजनावर पेडणेकर यांनी तीव्र आक्षेप घेतला. शहरातील ७१३ ते ७१४ रस्ते धुण्यासाठी २३३ टँकर वापरण्याचा निर्णय चुकीचा असल्याचे त्या म्हणाल्या. यासाठी विहिरींचे पाणी वापरणार असल्याचे प्रशासन सांगत आहे. मात्र, मुंबईत पाण्याची उपलब्धता किती आहे, याचाही विचार व्हायला हवा. पुणे आणि नाशिकसारख्या शहरांमध्ये एक दिवसाआड पाणीपुरवठा सुरू आहे. मुंबईवरही अशी परिस्थिती येऊ देऊ नका, असा इशारा त्यांनी दिला. प्रदूषण म्हणजे केवळ रस्त्यांवरील धूळ नाही. त्यासाठी व्यापक उपाययोजना आवश्यक आहेत. टँकरवाल्यांचा फायदा करण्यासाठी सरकारचा हा प्रयत्न असेल, तर त्याला विरोध असेल, असे पेडणेकर यांनी स्पष्ट केले.
इतर मुद्द्यांवरही सवाल
सामान्य नागरिकांनी शेकोटी पेटवली तर त्यांच्यावर दंडात्मक कारवाई केली जाते. मग मोठ्या हॉटेलमधून निघणाऱ्या धुरावर नियंत्रण ठेवण्यासाठी काय कारवाई करणार, असा सवालही त्यांनी उपस्थित केला. नियम सर्वांसाठी समान असायला हवेत, अशी भूमिका त्यांनी मांडली. या वेळी देवेंद्र भारती यांच्या भूमिकेवरही त्यांनी प्रश्न उपस्थित केले. कुर्ल्यातील प्रमोद महाजन उद्यानात घडलेल्या मारहाणीच्या घटनेवरही त्यांनी चिंता व्यक्त केली. साताऱ्यातून आलेल्या एका तरुणासह मित्रमैत्रिणी उद्यानात बसले असताना त्यांना मारहाण करण्यात आल्याचे समोर आले आहे. हे प्रकरण तितके साधे नसून, लहान मुलेही मारहाण करण्यासाठी पुढे येत असल्याचे त्या म्हणाल्या. उद्यानात सुरक्षारक्षक काय करत होते आणि पोलिसांची गस्त का नव्हती, असे सवाल त्यांनी उपस्थित केले. या घटनेला कोणताही जातीय-धार्मिक रंग देणार नसून प्रत्येक नागरिक सुरक्षित राहिला पाहिजे, अशी प्रतिक्रिया पेडणेकर यांनी दिली.
Leave a Reply