उत्तर प्रदेशचे मुख्यमंत्री योगी आदित्यनाथ यांच्या मातोश्री सावित्री देवी यांचे शुक्रवारी वयाच्या ९१ व्या वर्षी निधन झाले. उत्तराखंडमधील पौडी गढवाल जिल्ह्यातील पंचूर या त्यांच्या मूळ गावी त्यांनी अखेरचा श्वास घेतला. आईच्या निधनाची बातमी मिळाल्यानंतरही मुख्यमंत्र्यांनी आपले पूर्वनियोजित शासकीय कार्यक्रम पूर्ण केले. त्यानंतर शुक्रवारी सायंकाळी ते आईच्या अंतिम दर्शनासाठी पंचूर येथे पोहोचले.
कार्यक्रम सुरू असतानाच मिळाली बातमी
योगी आदित्यनाथ शुक्रवारी गोरखपूर येथील चंपा देवी पार्कमध्ये आयोजित टॅबलेट वितरण कार्यक्रमाला उपस्थित होते. या कार्यक्रमात सुमारे ५० हजार विद्यार्थ्यांना टॅबलेटचे वितरण करण्यात येणार होते. विद्यार्थ्यांना शिक्षण, तंत्रज्ञान आणि यशाचे महत्त्व सांगत भाषण करत असताना त्यांना आईच्या निधनाची बातमी मिळाली. मात्र त्यांनी आपले भाषण मध्येच थांबवले नाही. वैयक्तिक दुःख मनात ठेवून त्यांनी विद्यार्थ्यांशी संवाद सुरू ठेवला.
मुख्यमंत्री सायंकाळी चारनंतर त्यांच्या वडिलोपार्जित गावी दाखल झाले. त्यांनी आईच्या पार्थिवाचे दर्शन घेत पुष्प अर्पण केले आणि भावपूर्ण श्रद्धांजली वाहिली. त्यानंतर काही क्षण ते आईच्या पार्थिवासमोर शांतपणे उभे राहिले. यावेळी त्यांच्या डोळ्यांत अश्रू तरळल्याचे पाहायला मिळाले. कर्तव्याला प्राधान्य देणारा नेता म्हणून ओळख असलेल्या योगींच्या या भावनिक क्षणाने सर्वांचे मन हेलावले.
वडिलांच्या निधनावेळीही कर्तव्याला दिले होते प्राधान्य
योगी आदित्यनाथ यांच्या वडिलांचे, आनंद सिंह बिष्ट यांचे, कोरोना काळात निधन झाले होते. त्यावेळी योगी लखनौमधील शासकीय निवासस्थानी अधिकाऱ्यांसोबत बैठकीत होते. वडिलांच्या निधनाची माहिती त्यांना एका चिठ्ठीद्वारे देण्यात आली. माहिती वाचल्यानंतर त्यांनी ती चिठ्ठी खिशात ठेवली आणि बैठक सुरूच ठेवली होती.
नाथपंथाच्या संत परंपरेत दीक्षा घेतल्यानंतर योगी आदित्यनाथ यांनी आपले जीवन समाज आणि लोककल्याणासाठी समर्पित केले आहे. मात्र आईच्या निधनानंतर अंतिम दर्शन घेताना त्यांच्या डोळ्यांत दाटलेले अश्रू त्यांच्या मनातील भावनिक बाजू अधोरेखित करून गेले. वैयक्तिक दुःख कितीही मोठे असले तरी जबाबदारीपासून दूर न जाण्याचा त्यांचा हा प्रसंग पुन्हा एकदा चर्चेचा विषय ठरला आहे.
Leave a Reply