सोशल मीडियाच्या दुनियेत सध्या एका गाण्याची जोरदार चर्चा सुरू आहे. संपादक उमेश कुमावत यांनी लिहिलेले, संगीतबद्ध केलेले आणि स्वतःच्या आवाजात गायलेले ‘यू आर ट्रेंडिंग इन माय हार्ट’ हे गाणे सध्या तरुणाईच्या पसंतीस उतरत आहे. या गाण्याने लोकप्रियतेचा नवा टप्पा गाठला असून यूट्यूब आणि इन्स्टाग्रामवर मिळून या गाण्याला पाच लाखांहून अधिक व्ह्यूज मिळाले आहेत. अल्पावधीत मिळालेला हा प्रतिसाद लक्षवेधी ठरत आहे.
## यूट्यूब हिप-हॉप चार्टमध्ये स्थान
‘यू आर ट्रेंडिंग इन माय हार्ट’ या गाण्याला केवळ सोशल मीडियावरच नाही, तर संगीतप्रेमींकडूनही चांगला प्रतिसाद मिळत आहे. मिळालेल्या माहितीनुसार, यूट्यूबच्या हिप-हॉप प्लेलिस्टमध्ये या गाण्याने स्थान पटकावले आहे. त्यामुळे गाण्याची लोकप्रियता दिवसेंदिवस वाढताना दिसत आहे.
## नऊ वर्षांपूर्वी सुचलेली कल्पना
या गाण्याचे आणखी एक वैशिष्ट्य म्हणजे त्याची संकल्पना. जवळपास नऊ वर्षांपूर्वी उमेश कुमावत यांच्या मनात या गाण्याची कल्पना आली होती. मात्र, आजच्या डिजिटल युगात आणि विशेषतः जेन झी पिढीच्या आवडीनिवडींशी या गाण्याचे शब्द आणि संगीत अगदी जुळणारे ठरत आहेत. प्रेमाची भावना आणि सोशल मीडियावर वापरली जाणारी ट्रेंडिंग भाषा यांचा अनोखा मिलाफ या गाण्यात पाहायला मिळतो. या गाण्याचे लेखन, संगीत दिग्दर्शन आणि गायन या तिन्ही जबाबदाऱ्या उमेश कुमावत यांनीच सांभाळल्या आहेत. ११ नोव्हेंबर रोजी मुख्यमंत्री देवेंद्र फडणवीस यांच्या हस्ते या गाण्याचे अनावरण करण्यात आले होते.
यूट्यूब आणि इन्स्टाग्रामसोबतच हे गाणे स्पॉटिफाय, अॅपल म्युझिक, अॅमेझॉन म्युझिक, गाना आणि जिओसावन यांसारख्या डिजिटल प्लॅटफॉर्मवरही उपलब्ध आहे. पत्रकारितेच्या क्षेत्रात स्वतःची वेगळी ओळख निर्माण केल्यानंतर उमेश कुमावत यांच्या या नव्या प्रयोगाला मिळणारा प्रतिसाद पाहता ‘यू आर ट्रेंडिंग इन माय हार्ट’ हे गाणे सध्या तरुणाईच्या प्लेलिस्टमध्ये स्थान मिळवत असल्याचे चित्र आहे.
Leave a Reply