अभिनेता शरद कपूर सध्या त्याच्या वैयक्तिक आयुष्यामुळे चर्चेत आहे. काही दिवसांपूर्वी त्याच्या प्रकृतीची आणि आर्थिक परिस्थितीची माहिती समोर आल्यानंतर चित्रपटसृष्टीतील अनेक कलाकार त्याच्या मदतीसाठी पुढे आले होते. त्याच्या चार पाळीव कुत्र्यांची जबाबदारी प्राणीप्रेमी हेमा चौधरी यांनी घेतली आहे. मात्र, आता याच कुत्र्यांना ठेवण्यात आलेल्या मालाडमधील शेल्टरच्या परिसरात आग लागल्याची धक्कादायक घटना समोर आली आहे.
हेमा चौधरी या बेजुबान पब्लिक वेल्फेअर ट्रस्टच्या संस्थापक असून त्या प्राण्यांच्या मदतीसाठी काम करतात. मालाडमधील मढ आयलंड परिसरातील धारावली गावात त्यांचे शेल्टर आहे. या शेल्टरच्या अगदी जवळ मोठ्या प्रमाणात साठवून ठेवलेल्या लाकडांना आग लागल्याचे त्यांनी समाजमाध्यमांवर शेअर केलेल्या व्हिडिओमध्ये सांगितले. कोणीतरी जाणीवपूर्वक या लाकडांना आग लावून तिथून निघून गेल्याचा आरोप त्यांनी केला आहे. आग शेल्टरपर्यंत पोहोचली असती, तर मोठी दुर्घटना घडण्याची शक्यता होती, त्यामुळे शेल्टरमधील प्राण्यांच्या जीवाला धोका निर्माण झाला होता.
शेल्टरमध्ये ४० हून अधिक कुत्रे
हेमा चौधरी यांनी सांगितले की, त्यांच्या शेल्टरमध्ये शरद कपूरच्या चार कुत्र्यांसह जवळपास ४० हून अधिक कुत्रे आहेत. त्यामुळे आग लागल्याची घटना त्यांच्यासाठी अत्यंत चिंताजनक होती. एका ट्रकभर लाकडांचा साठा शेल्टरसाठी देण्यात आला होता. मात्र, याच लाकडांना आग लावण्यात आल्याचा त्यांचा आरोप आहे. शरद कपूरचे चार पाळीव कुत्रे सध्या प्राणी कल्याण केंद्राच्या देखरेखीखाली आहेत. शरदच्या आरोग्यविषयक आणि कौटुंबिक अडचणींमुळे त्यांना काही काळासाठी शेल्टरमध्ये हलवण्यात आले आहे.
धमकीचा आरोप; पोलिसांकडे तक्रार करणार
हेमा चौधरी यांनी आणखी एक गंभीर आरोप केला आहे. प्राणी कल्याण क्षेत्राशी संबंधित एका व्यक्तीने त्यांना शेल्टर बंद करण्याची धमकी दिल्याचे त्यांनी सांगितले. त्या व्यक्तीने जीवे मारण्याची धमकी दिल्याचाही दावा त्यांनी केला आहे. हेमा यांनी सांगितले की, संबंधित व्यक्तीने शरद कपूरची भेट घेतली होती. त्यावेळी त्याने अभिनेता संजय दत्त यांच्यासोबत बोलणे झाल्याचे म्हटले होते. समाजमाध्यमांवर व्हिडिओ पोस्ट केल्यानंतर आपल्याला रात्रभर धमक्या मिळाल्याचेही हेमा यांनी सांगितले. या व्यक्तीने केलेल्या शिवीगाळीची ध्वनिमुद्रण आपल्याकडे असल्याचेही त्यांनी म्हटले आहे. या प्रकरणी दुसऱ्या दिवशी पोलिसांकडे जाऊन तक्रार दाखल करणार असल्याचे हेमा यांनी स्पष्ट केले. तसेच शरद कपूरशी संबंधित वादात निष्पाप प्राण्यांना ओढू नये, असे आवाहनही त्यांनी केले आहे.
Leave a Reply