देशातील सर्वांत श्रीमंत उद्योगपती मुकेश अंबानी आणि त्यांचे कुटुंब नेहमी कोणत्या ना कोणत्या कारणाने चर्चेत असते. यावेळी चर्चेचा विषय आहे तो अंबानी यांच्या शेफने सांगितलेला एक प्रसंग. शेफ वरुण इनामदार यांनी एका मुलाखतीत अंबानी यांच्या घरातील बैठकीदरम्यान घडलेला किस्सा सांगितला असून तो सध्या मोठ्या प्रमाणात चर्चेत आहे.
दुपारचे जेवण आणि लांबलेली बैठक
अंबानी यांच्या दुपारच्या जेवणाची व्यवस्था करण्यासाठी वरुण इनामदार यांना बोलावण्यात आले होते. अंबानी यांच्या सचिवांनी त्यांना सव्वाबाराच्या सुमारास बोलावले होते आणि साडेबाराला बैठकीला ब्रेक मिळेल, असे सांगितले होते. मात्र बैठक संपता संपेना. एक वाजला, दीड वाजला, पावणेदोन, दोन, सव्वादोन, अडीच आणि पावणेतीन झाले, तरी बैठक सुरूच होती. तेवढा वेळ जेवण गरम करावे लागत असल्याने इनामदार बैठकीच्या खोलीच्या दाराच्या फटीतून आत डोकावून पाहत आणि पुन्हा दरवाजा लावत होते.
दार उघडून थेट विचारले
एकदा अंबानी यांच्या हे लक्षात आले. तेव्हा इनामदार यांनी दरवाजा आणखी उघडला आणि गुजराती भाषेत त्यांना म्हणाले, अजून किती पैसे कमावणार, चला जेवून घ्या. हे ऐकून अंबानी हसले. त्यानंतर त्यांनी माफी मागून बैठकीला ब्रेक घेऊया, असे सांगितले. बोर्डरुममधील सगळेच जण हा प्रसंग पाहून चकित झाले होते.
मोठी माणसं मोठी का असतात?
हा किस्सा सांगताना इनामदार म्हणाले, की मोठी माणसं मोठी का असतात, याचे हेच कारण आहे. त्या क्षणी अंबानी संतापून बाहेर जायला सांगू शकले असते, पण त्यांनी तसे केले नाही. उलट त्यांनी हसून परिस्थिती हलकी केली आणि बैठकीला ब्रेक दिला. अंबानी कुटुंबातील अशा अनेक किस्स्यांची चर्चा याआधीही होत आली आहे.
Leave a Reply