महाराष्ट्र पोलिस आणि इतर सरकारी दलांमध्ये भरती होण्याचे स्वप्न पाहणाऱ्या तरुणांना राज्य सरकारने मोठा दिलासा दिला आहे. आता राज्यातील सर्व महानगरपालिका, नगर परिषदा आणि नगरपंचायतींच्या मालकीची मैदाने, क्रीडांगणे आणि धावपट्ट्या शारीरिक चाचणीच्या सरावासाठी उमेदवारांना पूर्णपणे मोफत उपलब्ध करून देण्याचे आदेश नगर विकास विभागाने जारी केले आहेत. या आदेशांची तत्काळ अंमलबजावणी करण्याचे स्पष्ट निर्देशही देण्यात आले आहेत.
पोलिस दल आणि राज्य राखीव दलातील भरतीच्या सरावासाठी मैदान नसल्याने अनेक तरुण रस्त्यावर धावण्याचा सराव करताना दिसतात. त्यामुळे त्यांचा अपघात होण्याचीही शक्यता असते. काही तरुण खासगी अकॅडमींमध्ये प्रवेश घेऊन त्यांच्या माध्यमातून मैदानांमध्ये सराव करतात. तरुणांची ही अडचण कायमची दूर व्हावी, यासाठी स्थानिक स्वराज्य संस्थांची मैदाने सरावासाठी मोफत खुली करण्याचा निर्णय घेण्यात आला आहे. विशेषतः ग्रामीण आणि आर्थिकदृष्ट्या दुर्बल घटकांतील तरुणांना याचा मोठा फायदा होणार आहे.
सकाळी-संध्याकाळी चार तास सराव
सरकारच्या निर्णयानुसार सर्व महानगरपालिका, नगर परिषदा आणि नगरपंचायतींनी आपल्या हद्दीतील स्वतःच्या मालकीची अथवा व्यवस्थापनातील मैदाने, क्रीडांगणे आणि धावपट्ट्या शारीरिक चाचणी आवश्यक असलेल्या अधिकारी आणि कर्मचारी भरतीच्या सरावासाठी विनामूल्य उपलब्ध करून द्यावी, असे स्पष्ट करण्यात आले आहे. पहाटे पाच ते सकाळी नऊ आणि सायंकाळी चार ते रात्री आठ या वेळेत उमेदवारांना सराव करता येईल. मैदानावर पिण्याचे पाणी, स्वच्छतागृहे, बदलकक्ष, प्रकाशव्यवस्था आणि प्रथमोपचाराची सोय स्थानिक स्वराज्य संस्थांनी स्वनिधीतून करणे बंधनकारक आहे.
तांत्रिक मार्गदर्शनही मिळणार
जिल्हा क्रीडा अधिकारी आणि पोलिस प्रशिक्षण केंद्रांचे तांत्रिक मार्गदर्शनही उमेदवारांना मिळणार आहे. खासगी अकॅडमींचा अवाजवी खर्च वाचवण्यासोबतच नगर वाचनालयात संदर्भ साहित्य, मार्गदर्शन कक्ष आणि मोफत आरोग्य-नेत्रतपासणी शिबिरे आयोजित करण्याच्या सूचनाही सरकारने दिल्या आहेत. या कामासाठी प्रत्येक संस्थेत नोडल अधिकारी नेमला जाणार असून मैदानावर कोणत्याही व्यावसायिक किंवा राजकीय कार्यक्रमांना सक्त मनाई असेल. निर्णयाची तत्काळ अंमलबजावणी होणार असल्याने लाखो उमेदवारांचा मार्ग सुकर झाला आहे.
Leave a Reply