सोनिया गांधी यांच्या बिलॉन्गिंग: अ जर्नी ऑफ लव्ह या पुस्तकात स्वातंत्र्यवीर सावरकर यांच्याबद्दल आक्षेपार्ह लिखाण असल्याचा दावा करत शिंदे गटाच्या प्रवक्त्यांनी आज पत्रकार परिषद घेतली. या पत्रकार परिषदेत त्यांनी पुस्तकाची प्रत फाडून निषेध नोंदवला. मात्र निषेध नोंदवत असतानाच शिंदे गटाच्या नेत्या शायना एनसी यांच्या हातून शिवसेनाप्रमुख बाळासाहेब ठाकरे यांचाही फोटो फाडला गेला. त्यामुळे पुस्तकाचा निषेध करण्याचा प्रयत्न शिंदे गटाच्या चांगलाच अंगलट आला असून या घटनेमुळे नव्या वादाला तोंड फुटले आहे.
अंधारे यांची तीव्र प्रतिक्रिया
ठाकरे गटाच्या नेत्या सुषमा अंधारे यांनी या कृतीचा तीव्र शब्दांत निषेध नोंदवला. बाळासाहेबांनी ज्यांना राजकारणात ओळख दिली, ज्यांची वर्षा आणि सह्याद्रीवर वावरण्याची पत निर्माण केली, तेच लोक आज बाळासाहेबांचा फोटो फाडत असल्याचे त्यांनी म्हटले. ज्या लोकांचा संबंध नेहमी कमिशन, दलाली आणि टेंडरशी राहिला आहे, त्यांना वाचन संस्कृती कळणार नाही, अशी टीकाही त्यांनी केली. ज्यांना पुस्तके कळतात, ती लोक पुस्तके फाडत नाहीत. पुस्तक फाडणे हा पराकोटीचा द्वेष आणि तिरस्कार असल्याचे अंधारे म्हणाल्या.
पदासाठीचे राजकारण?
दिल्लीतून स्क्रिप्ट आली आणि नेत्यांनी ती आपल्या कार्यकर्त्यांसमोर ठेवली, असा आरोपही अंधारे यांनी केला. त्यांच्या म्हणण्यानुसार, ओरडताना या लोकांना हेही भान राहिले नाही की ज्या बाळासाहेबांमुळे त्यांची ओळख तयार झाली, त्यांचाच फोटो ते फाडत आहेत. एखादे पद मिळवण्यासाठी शायना एनसी कोणत्या पातळीवर जाऊ शकतात, हे यातून दिसून येते, असेही त्या म्हणाल्या. ठाकरे गट काँग्रेसच्या मांडीवर बसल्याच्या आरोपावरही त्यांनी प्रत्युत्तर दिले. ज्यांच्यावर भ्रष्टाचाराचे आरोप केले, त्यांच्याच मांडीला मांडी लावून बसण्याचा प्रकार आपण केला नसल्याचे त्यांनी सांगितले. पुस्तके वाचण्याची सवय नसलेल्या लोकांना फक्त टेंडरची कागदपत्रे वाचणे माहीत असल्याचा टोलाही त्यांनी लगावला.
Leave a Reply