पुण्याच्या कात्रज-गुजरवाडी भागातील दत्तनगरमध्ये क्षुल्लक कारणावरून दोन गटांतील तरुणांमध्ये हिंसक राडा झाला. एकमेकांकडे बघण्याच्या कारणावरून सुरू झालेला वाद काही वेळातच दगडफेकीपर्यंत गेला. या गोंधळात रस्त्यालगत उभ्या असलेल्या अनेक दुचाकींचे नुकसान झाले असून, पोलिसांनी ११ जणांविरुद्ध गुन्हा दाखल केला आहे.
नेमकं काय घडलं?
१४ नोव्हेंबर रोजी रात्री पावणेअकराच्या सुमारास दत्तनगरमधील मंदिराजवळ हा प्रकार घडला. दोन गटांतील तरुणांमध्ये आधी शाब्दिक बाचाबाची झाली आणि पाहता पाहता वादाला हिंसक वळण लागले. दोन्ही बाजूंच्या तरुणांनी मोठ्या संख्येने जमाव जमवून एकमेकांवर विटा आणि लाथाबुक्क्यांसह जोरदार दगडफेक केली. अचानक झालेल्या या दगडफेकीमुळे परिसरात एकच गोंधळ उडाला आणि रस्त्यावरून जाणारे नागरिक तसेच स्थानिक रहिवासी प्रचंड घाबरले. या गोंधळात उपद्रवी तरुणांनी रस्त्यालगत उभ्या केलेल्या अनेक दुचाकींची तोडफोड केली.
पोलिसांची तात्काळ कारवाई
घटनेची माहिती मिळताच भारती विद्यापीठ पोलीस ठाण्याचे वरिष्ठ पोलीस निरीक्षक सुदर्शन गायकवाड यांनी आपल्या पथकासह तातडीने घटनास्थळी धाव घेतली. पोलिसांच्या पथकाने वेगाने सूत्रे हलवत परिस्थिती तात्काळ नियंत्रणात आणली, त्यामुळे मोठा अनर्थ टळला. या प्रकरणी पोलीस कर्मचारी सुमीत केंजळे (वय ३३) यांनी फिर्याद दिली आहे. त्यांच्या फिर्यादीवरून सार्वजनिक सुव्यवस्था बिघडवणाऱ्या आणि हिंसाचार करणाऱ्या ११ जणांविरुद्ध गुन्हा दाखल करण्यात आला असून, पोलीस या प्रकरणाचा अधिक तपास करत आहेत.
Leave a Reply