अकोला परिमंडळातील थकबाकीदार वीजग्राहकांसाठी मोठा दिलासा मिळाला आहे. महावितरणने कायमस्वरूपी तसेच तात्पुरता वीजपुरवठा खंडित झालेल्या उच्चदाब व लघुदाब ग्राहकांसाठी ‘अभय योजना 2026-27’ जाहीर केली आहे. या योजनेचा लाभ अकोला परिमंडळातील 2 लाख 41 हजार 92 ग्राहकांना घेता येणार आहे. थकबाकीवरील 100 टक्के व्याज आणि विलंब आकार माफ केला जाणार आहे.
ही योजना 6 नोव्हेंबर 2026 ते 15 जानेवारी 2027 या कालावधीत लागू राहणार आहे. 31 मार्चपर्यंत कायमस्वरूपी वीजपुरवठा खंडित झालेले घरगुती, व्यावसायिक, औद्योगिक व अन्य बिगरशेती ग्राहक तसेच 31 डिसेंबर 2025 पर्यंत तात्पुरता वीजपुरवठा खंडित झालेले ग्राहक यासाठी पात्र आहेत. मात्र कृषिपंप ग्राहक आणि सार्वजनिक नळ पाणीपुरवठा योजना यातून वगळण्यात आल्या आहेत.
हप्त्यांची सोय आणि अतिरिक्त सवलत
उर्वरित मूळ थकबाकी एकरकमी भरल्यास त्यावर 20 टक्क्यांपर्यंत अतिरिक्त सवलत मिळणार आहे. लघुदाब ग्राहकांना 50 टक्के रक्कम आगाऊ भरून उर्वरित रक्कम सहा समान व्याजमुक्त मासिक हप्त्यांत भरता येईल. उच्चदाब ग्राहकांसाठी 3 ते 6 हप्त्यांचा पर्याय उपलब्ध आहे. 20 किलोवॉटपर्यंत मंजूर भार असलेल्या ग्राहकांनी वीजजोडणी पुन्हा सुरू करताना प्रीपेड स्मार्ट मीटरचा पर्याय निवडल्यास आणखी 5 टक्के सवलत मिळेल.
परिमंडळात 241 कोटींची मूळ थकबाकी
अकोला परिमंडळातील पात्र ग्राहकांकडे 241 कोटी 7 लाख रुपयांची मूळ थकबाकी असून, त्यावर 40 कोटी 55 लाख रुपये व्याज आणि 2 कोटी 95 लाख रुपये विलंब आकार आहे. अकोला जिल्ह्यातील 69 हजार 419 ग्राहकांकडे 75 कोटी 40 लाख रुपयांची मूळ थकबाकी आहे. बुलढाणा जिल्ह्यातील 1 लाख 10 हजार 366 ग्राहकांकडे 107 कोटी 26 लाख रुपयांची थकबाकी असून, वाशिम जिल्ह्यातील 61 हजार 307 ग्राहकांकडे 58 कोटी 41 लाख रुपयांची थकबाकी आहे. महावितरणचे मुख्य अभियंता दत्तात्रय बनसोडे यांनी पात्र ग्राहकांना योजनेचा लाभ घेण्याचे आवाहन केले आहे. योजनेत सहभागी होण्यासाठी महावितरणच्या अधिकृत ऑनलाइन पोर्टल किंवा मोबाइल अॅपद्वारे अर्ज करता येणार आहे.
Leave a Reply