जळगाव शहरात रविवारी सूर्योपासनेचा पवित्र सण असलेली छटपूजा मोठ्या उत्साहात आणि भक्तिमय वातावरणात साजरी करण्यात आली. मेहरुण तलावाच्या गणेश घाटावर आयोजित या सोहळ्यात उत्तर भारतीय समाजबांधवांनी पारंपरिक पद्धतीने छटमातेची पूजा करून सूर्यदेवाला अर्घ्य अर्पण केले. महिला, पुरुष आणि लहान मुलांसह मोठ्या संख्येने भाविक या सोहळ्यात सहभागी झाले होते.
पारंपरिक पद्धतीने पूजा
छटपूजेच्या पार्श्वभूमीवर भाविकांनी पूजेसाठी लागणारे साहित्य, फळे, फुले, ऊस, नारळ आणि पारंपरिक प्रसादाची तयारी केली होती. पूजेच्या ठिकाणी आकर्षक सजावट करण्यात आली होती. सायंकाळी मावळत्या सूर्याला अर्घ्य अर्पण करून कुटुंबाच्या सुख-समृद्धीसाठी, आरोग्य आणि आनंदासाठी प्रार्थना करण्यात आली. महिलांनी निर्जळी उपवास करून श्रद्धेने पूजा केली. पारंपरिक छटगीतांमुळे परिसरात भक्तिमय वातावरण निर्माण झाले होते.
उगवत्या सूर्याला अर्घ्य
उगवत्या सूर्याला अर्घ्य अर्पण करून रविवारी व्रताची सांगता करण्यात आली. छटपूजा हा उत्तर भारतीय समाजाचा महत्त्वाचा धार्मिक सण असून त्यात सूर्यदेव आणि छटमातेची आराधना केली जाते. या उत्सवामुळे शहरातील उत्तर भारतीय समाजबांधवांमध्ये उत्साहाचे वातावरण दिसून आले.
Leave a Reply