एकदाच रिचार्ज, वर्षभर सुट्टी! जिओ, एअरटेल, व्हीआय प्लॅन तुलना

दर महिन्याला मोबाईल रिचार्ज करताना तारीख लक्षात ठेवावी लागते. कधीकधी रिचार्ज विसल्यामुळे प्लॅन अचानक संपतो आणि अनेक कामांमध्ये अडचण येते. यामुळे अनेक वापरकर्ते एका वर्षाच्या वैधतेचे रिचार्ज घेणे पसंत करतात. जिओ, एअरटेल आणि व्होडाफोन आयडिया (व्हीआय) या तिन्ही कंपन्या ३६५ दिवसांच्या वैधतेचे प्लॅन देतात. मात्र, त्यांच्या किमती आणि फायदे सारखे नाहीत. काही कंपन्यांकडे कमी किमतीत फक्त कॉलिंगचे प्लॅन आहेत, तर काही कंपन्या अधिक डेटा आणि ५जी सुविधा देतात. त्यामुळे एकदा रिचार्ज करून वर्षभराच्या त्रासातून सुटका हवी असेल, तर आधी या तीन कंपन्यांच्या प्लॅनची तुलना करून पाहा.

## एअरटेल आणि व्हीआयचा १,८४९ रुपयांचा प्लॅन सर्वात स्वस्त

जर तुम्हाला जास्त मोबाईल डेटाची गरज नसेल आणि फक्त कॉलिंगसाठी तुमचा नंबर सक्रिय ठेवायचा असेल, तर एअरटेल आणि व्हीआयचे १,८४९ रुपयांचे वार्षिक प्लॅन पाहू शकता. दोन्ही कंपन्या ३६५ दिवसांची वैधता देतात. त्यामुळे एकदा रिचार्ज केल्यावर तुमचा नंबर संपूर्ण वर्षभर सक्रिय राहील. या प्लॅनमध्ये देशभरातील कोणत्याही नेटवर्कवर अमर्यादित कॉलिंग आणि संपूर्ण ३६५ दिवसांसाठी एकूण ३,६०० एसएमएस मिळतात. मात्र, यामध्ये दैनंदिन वापरासाठी इंटरनेट डेटा दिला जात नाही. ज्यांच्या घरी किंवा कार्यालयात वाय-फाय आहे आणि ज्यांना कमी मोबाईल डेटाची आवश्यकता आहे, त्यांच्यासाठी हे प्लॅन उपयुक्त ठरू शकतात.

## इंटरनेट वापरणाऱ्यांसाठी जिओचा ३,५९९ रुपयांचा प्लॅन

जर तुम्ही दररोज मोबाईल इंटरनेट वापरत असाल, तर जिओचा ३,५९९ रुपयांचा वार्षिक प्लॅन तुमच्यासाठी एक पर्याय असू शकतो. यामध्ये ३६५ दिवसांच्या वैधतेसह दररोज २.५ जीबी हाय-स्पीड डेटा मिळतो. तसेच, कोणत्याही नेटवर्कवर अमर्यादित कॉलिंग आणि दररोज १०० एसएमएसची सुविधाही मिळते. या प्लॅनमध्ये जिओटीव्ही आणि जिओएआयक्लाउडसारख्या अॅप्सचा अॅक्सेस देखील मिळतो. पात्र वापरकर्त्यांना जिओचे ५जी नेटवर्क उपलब्ध असलेल्या भागांमध्ये अमर्यादित ५जी डेटाचा लाभही घेता येईल. जास्त डेटा वापरणाऱ्यांसाठी हा प्लॅन उपयुक्त ठरू शकतो.

एअरटेलकडेही ३,५९९ रुपयांचा वार्षिक रिचार्ज प्लॅन आहे. त्याची वैधता ३६५ दिवसांची आहे. वापरकर्त्यांना दररोज २ जीबी हाय-स्पीड डेटा, देशभरात अमर्यादित लोकल आणि एसटीडी कॉलिंग आणि दररोज १०० एसएमएस मिळतात. पात्र वापरकर्त्यांना या प्लॅनअंतर्गत अमर्यादित ५जी डेटाचा लाभही घेता येईल. परंतु, हे नेटवर्कच्या उपलब्धतेवर आणि कंपनीच्या अटी व शर्तींवर अवलंबून असेल. त्यामुळे एअरटेल वापरकर्त्यांनी रिचार्ज करण्यापूर्वी आपल्या परिसरात ५जी नेटवर्कची उपलब्धता तपासावी.

व्होडाफोन आयडियाकडे (व्हीआय) ३६५ दिवसांच्या वैधतेसह ३,४९९ आणि ३,५९९ रुपयांचे दोन प्लॅन आहेत. ३,४९९ रुपयांच्या प्लॅनमध्ये दररोज १.५ जीबी डेटा मिळतो, तर ३,५९९ रुपयांच्या प्लॅनमध्ये दररोज २ जीबी डेटा मिळतो. या प्लॅनअंतर्गत वापरकर्त्यांना रात्री १२ ते सकाळी ६ वाजेपर्यंत अमर्यादित नाईट डेटा मिळतो. विशेष गोष्ट म्हणजे, या वेळेत वापरलेला डेटा दैनंदिन डेटा मर्यादेतून वजा होत नाही. जे लोक रात्रीच्या वेळी भरपूर व्हिडिओ पाहतात, डाउनलोड करतात किंवा इंटरनेट वापरतात, त्यांच्यासाठी हे वैशिष्ट्य फायदेशीर ठरू शकते.

## कोणता प्लॅन तुमच्यासाठी अधिक चांगला?

जर तुम्हाला फक्त कॉल करायचे असतील आणि तुमचे सिम पूर्ण वर्षभर चालू ठेवायचे असेल, तर एअरटेल आणि व्हीआयचा १,८४९ रुपयांचा प्लॅन कमी किमतीत एक चांगला पर्याय आहे. जर तुम्हाला दररोज जास्त डेटा हवा असेल, तर जिओच्या ३,५९९ रुपयांच्या प्लॅनमध्ये दररोज २.५ जीबी डेटा मिळतो. एअरटेलच्या ३,५९९ रुपयांच्या प्लॅनमध्ये दररोज २ जीबी डेटा मिळतो. दुसरीकडे, जे लोक रात्रीच्या वेळी जास्त इंटरनेट वापरतात त्यांच्यासाठी व्हीआयचे ३,४९९ रुपये किंवा ३,५९९ रुपयांचे प्लॅन उपयुक्त ठरू शकतात.

स्रोत: मूळ बातमी