राष्ट्रवादी काँग्रेसच्या विलिनीकरणाच्या चर्चांवर राष्ट्रवादीचे नेते छगन भुजबळ यांनी महत्त्वपूर्ण भाष्य केले आहे. पक्षातील सर्व नेते एकत्र बसून निर्णय घेतील, असे त्यांनी सांगितले. समोरच्या गटाला नेमके काय हवे आहे, हे अद्याप कळलेले नाही. सर्व जण एनडीएत जाणार आहेत की सर्व जण इंडिया आघाडीत जाणार आहेत, याचा शोधबोध झाला नसल्याचेही त्यांनी नमूद केले. सुनेत्रा ताईंनी सांगितल्याप्रमाणे योग्य वेळ येईल तेव्हा सर्वांना कळेल. त्या आधी सुनेत्राताई सर्वांना विश्वासात घेऊन सांगतील, अशी खात्री असल्याचे भुजबळ यांनी सांगितले.
विलिनीकरणाच्या चर्चा आम्हीही ऐकत आहोत, असे भुजबळ म्हणाले. सध्या मर्जरचा खेळ सुरू असल्याचे त्यांनी नमूद केले. विलिनीकरण व्हायचे असेल तर ते दोन्ही बाजूंनी एकत्रितपणे व्हायला हवे, अशी त्यांची भूमिका आहे. क्रिकेट सामन्याचा दाखला देत त्यांनी सांगितले की, एक खेळाडू मैदानात उतरतो तेव्हा संपूर्ण संघ त्याच्यासोबत असतो. काही चर्चा होऊन नंतर पुन्हा घरी परतणे, असा प्रकार चालणार नाही. सर्वांनी एकत्र बसून, एकमेकांशी चर्चा करून निर्णय घ्यायला हवा. तुकड्या तुकड्याने काही करण्याची गरज नाही, असे त्यांनी स्पष्ट केले. आमच्यापर्यंत विलिनीकरणाबाबत काहीही पोहोचलेले नाही. आम्हीही दूरचित्रवाणीवर पाहत आहोत. कोण कोणाला भेटतंय, काय घडतंय, याची माहिती आम्हाला नाही, असेही ते म्हणाले.
पवारांशी भेट, पण विलिनीकरणावर चर्चा नाही
शरद पवार यांना अजितदादा गटाचे आमदार भेटत आहेत. त्यावरही भुजबळ यांनी भाष्य केले. पवार साहेबांना भेटायला मीही गेलो होतो. हॉस्पिटलमध्ये गेलो होतो. घरीही गेलो होतो. त्यांच्या तब्येतीची विचारपूस करण्यासाठी जाणं चूक नाही, असे ते म्हणाले. माझ्या आयुष्यात दोन नेते आहेत. एक बाळासाहेब ठाकरे आणि दुसरे शरद पवार आहेत. हे दोन्ही नेते माझे मार्गदर्शक आहेत. दुर्देवाने बाळासाहेब आज हयात नाहीत. पण शरद पवार यांचा पक्ष वेगळा आहे आणि मी वेगळ्या पक्षात आहे. बाकी सर्व माझे सहकारी आहेत, असे भुजबळ यांनी स्पष्ट केले.
मीही शरद पवारांना भेटलो. पण मर्जरच्या खेळाची चर्चा केली नाही. आमचे चांगले संबंध आहेत. पवारांचा स्वभाव असा आहे की, राजकारणातील किती मोठा विरोधक असला तरी ते त्याच्याशी संबंध ठेवतात. त्याच्याशी प्रेमाने बोलतात. प्रत्येक गोष्टीत शत्रूत्व ठेवत नाहीत. ही गोष्ट आम्ही शिकलो. राज्यातील ते सर्वात ज्येष्ठ नेते आहेत, असे त्यांनी सांगितले.
दोन्ही पवार एकत्र आले तर आनंदच
सर्व एकत्र आले तर आनंद आहे. उद्या दोन्ही शिवसेना एकत्र आल्या, ठाकरे बंधू एकत्र आले तर जुन्या शिवसैनिकांना आनंद होईल. तसेच दोन पवार एकत्र आले तर ज्यांनी राष्ट्रवादी स्थापन करण्यात मोलाचा वाटा उचलला त्यांना आनंद होईल, असे भुजबळ म्हणाले. शरद पवार आणि मी राष्ट्रवादीची स्थापना केली. काही लोक त्यावेळी राष्ट्रवादीत यायला मागे पुढे पाहत होते. काँग्रेसमध्ये राहावं की राष्ट्रवादीत यावं, असं त्यांना वाटत होतं. त्यामुळे काही लोक चार महिन्यांनी राष्ट्रवादीत आले. काही सहा महिन्यांनी आले. पण दोन्ही पवार एकत्र आले तर जुन्या जाणत्यांना आनंदच होईल, असे ते म्हणाले.
स्रोत: मूळ बातमी
Leave a Reply