राष्ट्रवादी काँग्रेसच्या विलिनीकरणाच्या चर्चांना प्रदेशाध्यक्ष सुनील तटकरे यांनी हवा दिल्याचे सांगितले जात आहे. त्यामुळे शरद पवार गटाच्या नेत्यांनी तटकरे यांच्यावर जोरदार टीका सुरू केली आहे. पूर्वी विलिनीकरणाला विरोध करणारे तटकरे आता या विषयावर का बोलत आहेत, असा सवाल शरद पवार गटातून उपस्थित केला जात आहे. या पार्श्वभूमीवर तटकरे यांना या प्रकरणात व्हिलन ठरवल्यासारखे चित्र निर्माण झाले आहे. या संदर्भात त्यांची कन्या आणि राज्याच्या मंत्री आदिती तटकरे यांनी पहिल्यांदाच प्रतिक्रिया दिली आहे. वडिलांना व्हिलन का केले जात आहे, असा सवालच त्यांनी केला आहे.
मुलगी म्हणून भूमिका मांडली
आदिती तटकरे नंदुरबार दौऱ्यावर आहेत. यावेळी त्यांनी माध्यमांशी संवाद साधला. राष्ट्रवादीच्या विलिनीकरणाच्या प्रकरणात सुनील तटकरे यांना व्हिलन ठरवलं जात असल्याबद्दल त्यांना विचारण्यात आले. त्यावर त्यांनी ही दुर्दैवी गोष्ट असल्याचे म्हटले. या मुद्द्यावर आपण मुलगी म्हणून बोलत असल्याचे त्यांनी स्पष्ट केले. तटकरे यांना व्हिलन ठरवलं जात असल्याचे दुःख वाटत असल्याचे त्यांनी सांगितले. अजित पवार आणि सुनील तटकरे यांना आपण अनेक वर्षांपासून एकत्र पाहिल्याचे त्यांनी नमूद केले. राष्ट्रवादीच्या स्थापनेपूर्वीपासून, काँग्रेसमध्ये असल्यापासून दोघेही मित्र आहेत. अनेक प्रसंगांना दोघेही एकत्रितपणे सामोरे गेले, पण त्यांच्या मैत्रीत दुरावा आला नाही, असे आदिती तटकरे म्हणाल्या. आता अजित पवार नाहीत, पण मित्र म्हणून तटकरे आपले कर्तव्य पार पाडत राहतील. टीका होत राहते, पण प्रदेशाध्यक्ष म्हणून आणि मित्र म्हणून ते आपली जबाबदारी पार पाडत आहेत, असे त्यांनी सांगितले.
फोन आला नसल्याचे स्पष्ट
सुनेत्रा पवार यांच्या कार्यालयातून विलिनीकरणासाठी आमदारांना फोन जात असल्याच्या चर्चेबद्दल आदिती तटकरे यांना विचारण्यात आले. त्यावर त्यांनी आपल्याला फोन आलेला नसल्याचे सांगितले. बऱ्याच शंका-कुशंका आणि बातम्या सुरू आहेत, पण आपण सुनेत्रा पवार यांच्या नेतृत्वात काम करत असल्याचे त्यांनी स्पष्ट केले. सध्या राजकीय हालचालींपेक्षा ज्या विभागाची आपण मंत्री आहोत, त्या विभागाकडे अधिक लक्ष केंद्रित करत असल्याचे त्यांनी नमूद केले.
निर्णय वरिष्ठ नेते घेतील
विलिनीकरणावर थेट भाष्य करणे आदिती तटकरे यांनी टाळले. आपण छोटी कार्यकर्ती असल्याचे सांगत त्यांनी शरद पवार, सुनेत्रा पवार आणि सुप्रिया सुळे याबाबत निर्णय घेतील, असे स्पष्ट केले. आपण सुनेत्रा पवार यांच्या नेतृत्वात काम करत असून, त्या जी भूमिका घेतील, ती कार्यकर्ता म्हणून मान्य असेल, असे त्यांनी सांगितले. शिंदे गटाचे नेते रामदास कदम यांनी सुनील तटकरे यांच्यावर केलेल्या टीकेवरही त्यांनी प्रतिक्रिया दिली. अशी टीका निंदनीय आणि निषेधार्ह असल्याचे त्यांनी म्हटले. तिन्ही नेत्यांच्या नेतृत्वात महायुतीचे सरकार जनतेसाठी काम करत असून राज्याला पुढे नेत असल्याचे त्यांनी सांगितले. महायुतीचे सर्व घटक पक्ष म्हणून एकत्र काम केले पाहिजे. प्रत्येकाने आपली जबाबदारी ओळखून महायुतीत मिठाचा खडा टाकू नये. जबाबदारी एका बाजूने पार पाडली जात नाही, दोन्ही बाजूंनी पार पाडली जाते, असे त्यांनी नमूद केले. मित्रपक्षांनी एकमेकांवर टीका टाळली तर चांगल्या पद्धतीने काम करता येईल, असे प्रत्युत्तर त्यांनी दिले.
स्रोत: मूळ बातमी
Leave a Reply