सुनील तटकरे आणि रामदास कदम यांच्यातील वादामध्ये शिवसेनेचे नेते आणि मंत्री भरत गोगावले यांनी उडी घेतली आहे. निवडणुकीच्या तोंडावर तटकरे यांच्या नावाची शिफारस स्वतः रामदास कदम यांनीच केली होती आणि सर्वांनी मिळून त्यांना निवडूनही आणलं होतं, असं सांगत गोगावलेंनी दोघांमधील अचानक दुराव्यावर आश्चर्य व्यक्त केलं आहे. वरच्या स्तरावर जसे नेत्यांचे जुळते, तसेच तळागाळातही समन्वय असायला हवा, अशी परखड भूमिका त्यांनी घेतली. तसेच या प्रकरणात एकनाथ शिंदे यांनी लक्ष घालावं, असंही ते म्हणाले.
गोगावले नेमकं काय म्हणाले?
रामदास कदम आमचे ज्येष्ठ नेते आहेत. निवडणूक जाहीर होण्याच्या आधीच रामदास कदम यांनी तटकरे यांच्या नावाचं समर्थन केलं होतं आणि त्यांना निवडून आणण्यासाठी प्रामाणिकपणे काम केलं होतं. पण त्यानंतर रामदास कदम आणि तटकरे यांच्यामध्ये नेमकं काय घडलं, याची आपल्याला कल्पना नाही आणि आपण कधी त्याबद्दल विचारणाही केली नाही, असं भरत गोगावले म्हणाले. वरच्या पातळीवर मुख्यमंत्री आणि दोन्ही उपमुख्यमंत्री यांचे जसे ट्युनिंग जुळते, तसेच तळागाळातही जुळायला हवे, असं मलाही वाटतंय. या प्रकरणाची एकनाथ शिंदे दखल घेऊन लवकरच त्यावर काही ना काही तोडगा काढतील, असा विश्वास असल्याचं गोगावले म्हणाले.
वादाची पार्श्वभूमी काय?
राष्ट्रवादी काँग्रेस (अजित पवार गट) आणि शिवसेना (एकनाथ शिंदे गट) या दोन सत्ताधारी पक्षांमधील वाद, कुरबुरी आणि आरोप-प्रत्यारोपांचं राजकारण संपूर्ण महाराष्ट्राने पाहिलं आहे. विशेषतः रायगडच्या पालकमंत्रिपदावरून राष्ट्रवादी आणि शिवसेना थेट आमनेसामने आले होते, ज्याचे पडसाद महायुतीच्या राजकीय वर्तुळात उमटले. भरत गोगावले आणि सुनील तटकरे यांच्यातील वाद आता शांत झाला आहे, असं वाटत असतानाच त्याला आता तटकरे विरुद्ध रामदास कदम अशी नवी किनार लाभल्याचं स्पष्ट दिसत आहे. रामदास कदम यांनी सुनील तटकरे यांच्यावर अत्यंत गंभीर आरोप केल्यामुळे महाराष्ट्राच्या राजकारणात मोठी खळबळ उडाली होती. अजित पवार यांच्या निधनानंतर सुनील तटकरे यांनी उपमुख्यमंत्री आणि अर्थमंत्रिपदासाठी आमदारांना फोन केले होते का, याची चौकशी करण्यात यावी, अशी मागणी रामदास कदम यांनी केली होती. या विधानामुळे रायगडमधील दोन्ही सत्ताधारी पक्षांमधील अंतर्गत वाद पुन्हा एकदा चव्हाट्यावर आला आहे. आता या वादावर तोडगा काढण्यासाठी भरत गोगावले यांनी थेट एकनाथ शिंदे यांनी यात लक्ष घालण्याची विनंती केली आहे.
स्रोत: मूळ बातमी
Leave a Reply