माजी मुख्यमंत्री अजित पवार यांचा विमान अपघात होता की घातपात, यावरून दावे-प्रतिदावे सुरू आहेत. आमदार रोहित पवार यांनी मध्यंतरी यावरून मोठे वादळ उठवले होते. त्यानंतर सोमवारी ऐन दिवाळीत शिवसेना नेते रामदास कदम यांनी राष्ट्रवादीचे प्रदेशाध्यक्ष सुनील तटकरे यांच्यावर आरोपांची लडच लावली. त्यांनी अपघातावरून तटकरे यांच्यावर संशय व्यक्त केला आणि विमान अपघातामागे तटकरेंचा हात असल्याचा आरोप करत थेट चौकशीची मागणी केली.
आज तटकरे हे अजित पवार यांच्या स्मृतीस्थळाला भेट देण्यासाठी बारामती येथे आले. त्यावेळी त्यांनी रामदास कदम यांना एकाच वाक्यात प्रत्युत्तर दिले.
## तटकरे स्मृतीस्थळी काय म्हणाले
दादांशिवाय बारामतीत येण्याचा दुर्दैवी क्षण आपल्यावर आला आहे, असे तटकरे म्हणाले. गेल्या तीन दशकांपासून ते आवर्जून पाडव्याला बारामतीला येत होते. बारामतीत उसळलेला जनसागर त्यांनी अनुभवला आहे. पाडव्याला दादांची भेट होत असे आणि शरद पवार यांनाही भेटण्याचा योग येत असे. आज दादांशिवाय पाडवा मनाला पटूच शकत नाही, अशी भावना त्यांनी व्यक्त केली.
नियतीपुढे कुणाचे काही चालत नाही, असेही ते म्हणाले. पाडव्याच्या शुभेच्छा त्यांच्याकडून घ्याव्यात, या कृतज्ञतेच्या भूमिकेतून ते स्मृतीस्थळी आले आहेत. या पवित्र स्मृतीस्थळी आलो असल्याने कुठलेही राजकीय भाष्य करणार नाही, असे सुनील तटकरे यांनी स्पष्ट केले.
रामदास कदम यांनी केलेल्या आरोपांवर तटकरे यांनी थेट पलटवार करण्याचे संकेत दिले असले, तरी स्मृतीस्थळाच्या पवित्रतेचा मान राखत त्यांनी यावेळी राजकीय भाष्य टाळले. या प्रकरणावर पुढे काय भूमिका घेतली जाते, याकडे आता लक्ष लागले आहे.
स्रोत: मूळ बातमी
Leave a Reply