दिवाळीचा सण एका गरीब कुटुंबासाठी आयुष्यभर लक्षात राहील असा ठरला. ज्या दिवशी घरात एका चिमुकल्या मुलीचा जन्म झाला, त्याच दिवशी कुटुंबाचं नशीबही पालटलं. अवघ्या २०० रुपयांच्या एका लॉटरी तिकिटानं त्यांच्या आयुष्यात दीड कोटी रुपयांचं बक्षीस आलं. एकाच दिवशी लेकीच्या आगमनाचा आनंद आणि मोठ्या बक्षिसाची बातमी मिळाल्यानं कुटुंबाचा दिवाळीचा आनंद दुप्पट झाला.
२०० रुपयांचं तिकीट, दीड कोटींचं बक्षीस
पंजाबच्या मानसा जिल्ह्यातील बुढलाडा परिसरातील सैदेवाला गावात राहणाऱ्या एका कुटुंबानं २०० रुपयांना लॉटरीचं तिकीट घेतलं होतं. हे तिकीट हरमन कौर यांच्या नावानं खरेदी करण्यात आलं होतं. निकाल जाहीर झाला तेव्हा याच तिकिटाला पहिलं बक्षीस लागलं आणि कुटुंबानं दीड कोटी रुपये जिंकले. बुढलाडा येथील भीखी रोडवरील धन्ना लॉटरी स्टॉलचे मालक धन्ना सिंह यांनी या घटनेची माहिती दिली. त्यांच्या सांगण्यानुसार, शनिवारी एक व्यक्ती काउंटरवर आली होती आणि तिनं हरमन कौर यांच्या नावानं तिकीट घेतलं होतं. निकाल लागताच स्टॉलवर आणि कुटुंबात आनंदाचं वातावरण निर्माण झालं.
लेकीच्या आगमनानं दिवाळी अविस्मरणीय
ज्या दिवशी कुटुंबाला लॉटरी लागली, त्याच दिवशी घरात मुलीचा जन्म झाला होता. नवजात मुलीची प्रकृती ठीक नसल्यानं कुटुंबीयांनी तिला वैद्यकीय तपासणीसाठी नेलं आहे. लॉटरी स्टॉलचे मालक धन्ना सिंह यांनी विजेत्या कुटुंबाला स्टॉलवर बोलावून त्यांचा सन्मान करण्याचा निर्णय घेतला आहे. चिमुकल्या मुलीच्या आगमनानं आणि दीड कोटींच्या बक्षिसानं या कुटुंबाची दिवाळी अविस्मरणीय ठरली असून, या बक्षिसामुळे कुटुंबाची गरिबी दूर झाली आहे.
स्रोत: मूळ बातमी
Leave a Reply