बॉलिवूडचे महानायक अमिताभ बच्चन आणि गांधी कुटुंब यांच्यात एकेकाळी अतिशय जिव्हाळ्याचे संबंध होते. राजीव गांधी आणि अमिताभ बच्चन यांच्या मैत्रीची उदाहरणे दिली जायची. सोनिया गांधी भारतात पहिल्यांदा आल्या तेव्हा बच्चन कुटुंबाने त्यांना आपल्या घरात मुलीप्रमाणे स्थान दिले होते. मात्र कालांतराने या दोन कुटुंबांमधील संबंध बिघडले आणि त्यांच्यात मोठी दरी निर्माण झाली. आता सोनिया गांधी यांच्या ‘Belonging: A Journey of Love’ या पुस्तकाच्या निमित्ताने या जुन्या मैत्रीची आणि त्यातील दुराव्याची पुन्हा चर्चा सुरू झाली आहे.
१९६८ मध्ये भारतात आल्यावर बच्चन कुटुंबाचा आधार
सोनिया गांधी यांनी आपल्या पुस्तकात जानेवारी १९६८ मध्ये भारतात आल्याचा अनुभव सांगितला आहे. १३ जानेवारी १९६८ रोजी पहाटे त्या दिल्ली विमानतळावर दाखल झाल्या होत्या. त्यावेळी राजीव गांधी, त्यांचे भाऊ संजय गांधी आणि मित्र अमिताभ बच्चन त्यांना घेण्यासाठी विमानतळावर पोहोचले होते. सोनिया भारतात आल्यानंतर त्या काही काळ अमिताभ बच्चन यांचे वडील आणि प्रसिद्ध कवी हरिवंशराय बच्चन तसेच आई तेजी बच्चन यांच्या घरी राहिल्या. इंदिरा गांधी आणि बच्चन कुटुंबाचे जुने कौटुंबिक संबंध होते. त्यामुळे सोनिया यांना भारतीय संस्कृती, परंपरा आणि राहणीमान समजून घेण्यासाठी बच्चन कुटुंबाने आपुलकीने मदत केली. सोनिया गांधी यांनी तेजी बच्चन यांचा उल्लेख प्रेमळ आणि आधार देणाऱ्या व्यक्ती म्हणून केला आहे. त्या आपल्यासाठी आईसारख्या होत्या, असेही त्यांनी आपल्या पुस्तकात नमूद केले आहे.
सोनिया गांधी हरिवंशराय बच्चन यांना प्रेमाने ‘अंकल बच्चन’ म्हणत असत. ते त्यांना अधूनमधून हिंदी भाषेतील काही शब्द शिकवत असत. त्याचबरोबर त्यांनी सोनिया यांना एक महत्त्वाचा सल्लाही दिला होता. या देशात तुम्ही प्रत्यक्षात काय आहात, यापेक्षा लोक तुम्हाला काय समजतात, याला अधिक महत्त्व असते, असे ते म्हणाले होते. सुरुवातीला सोनिया यांना या सल्ल्याचा नेमका अर्थ समजला नव्हता. मात्र पुढील आयुष्यात त्यांना या शब्दांचे महत्त्व जाणवले, असे त्यांनी पुस्तकात लिहिले आहे.
मैत्रीत दरी कशी आली?
एककाळी राजीव गांधी आणि अमिताभ बच्चन यांची मैत्री देशभरात चर्चेचा विषय होती. दोन्ही कुटुंबांमध्ये नियमित येणे-जाणे होते. त्यांचे संबंध केवळ राजकीय किंवा व्यावसायिक नव्हते, तर कौटुंबिक जिव्हाळ्याचे होते. मात्र कालांतराने या नात्यात दुरावा निर्माण झाला. या मैत्रीत दरी निर्माण होण्यामागे अनेक कारणे सांगितली जातात. त्यापैकी बोफोर्स प्रकरण हे एक महत्त्वाचे कारण मानले जाते. या वादाच्या काळात बच्चन कुटुंबाने कठीण परिस्थितीत गांधी कुटुंबाला अपेक्षित साथ दिली नाही, अशी नाराजी निर्माण झाल्याचे वृत्त आहे. अमिताभ बच्चन यांनीही एका वेळी ‘ते राजा आहेत आणि आम्ही रंक आहोत,’ असे विधान केल्याचे सांगितले जाते. तसेच जया बच्चन यांचीही गांधी कुटुंबाबद्दल नाराजी असल्याच्या बातम्या समोर आल्या होत्या. गांधी कुटुंबातील लोकांनी आपल्या पतीला दुखावल्याची भावना त्यांनी व्यक्त केल्याचे वृत्त होते.
स्रोत: मूळ बातमी
Leave a Reply