कर्जत तालुक्यातील सायडोंगर परिसरात एका प्रकल्पासाठी हजारो झाडे तोडली जात असल्याच्या मुद्द्यावरून वातावरण तापले आहे. या परिसरातील वृक्षतोड पाहिल्यानंतर अभिनेते आणि पर्यावरणप्रेमी सयाजी शिंदे यांनी तीव्र संताप व्यक्त केला आहे. राज्य सरकारच्या भूमिकेवर सडकून टीका करत त्यांनी झाडे वाचवण्यासाठी नागरिकांनी एकत्र येण्याचे आवाहन केले.
कर्जत तालुक्यातील पालीतर्फे कोतवाल खलाटी येथील सायडोंगर परिसरात सुरू असलेली वृक्षतोड पाहण्यासाठी शिंदे तेथे गेले होते. त्यांच्यासोबत कर्जत पर्यावरण बचाव समितीचे समन्वयक अॅड. कैलास मोरेही उपस्थित होते. या परिसरातील नागरिक, पर्यावरणप्रेमी आणि विरोधकांनी वृक्षतोडीला विरोध करत महायुती सरकारला घेरले असून, वेगवेगळ्या स्तरांवर विरोध सुरू आहे.
पर्यावरणमंत्र्यांवर थेट प्रश्न
शिंदे यांनी पर्यावरणमंत्री पंकजा मुंडे यांच्यावरही निशाणा साधला. हजारो झाडांची कत्तल होत असताना पर्यावरणमंत्री शांत का आहेत, असा सवाल त्यांनी उपस्थित केला. मंत्र्यांना खातं देताना त्यांना त्या खात्याचे ज्ञान आहे का, हे पाहणे गरजेचे असल्याचे ते म्हणाले. विकासाच्या नावाखाली हजारो झाडांवर कुऱ्हाड चालवली जात असेल, तर पर्यावरणाचे रक्षण करणार कोण, असा प्रश्नही त्यांनी विचारला.
झाडे तोडली जातात, पण त्यांच्या मृत्यूवर कुणी शोकसभा घेत नाही, अशी खंतही त्यांनी व्यक्त केली. ही झाडे आपल्याला ऑक्सिजन देतात, त्यामुळे या ठिकाणी झाडांना श्रद्धांजली वाहण्यासाठी आल्याचे त्यांनी सांगितले. नागरिकांनी मोठ्या संख्येने आंदोलनात सहभागी व्हावे, असे आवाहनही त्यांनी केले. तसेच टोरेंट कंपनीच्या गाड्या अडवण्याचे आवाहनही त्यांनी नागरिकांना केले.
८० प्रकारच्या पक्ष्यांचे घर उद्ध्वस्त?
सायडोंगर परिसरातील जुन्या झाडांवर जवळपास ८० प्रकारचे पक्षी राहत असल्याचा दावा शिंदे यांनी केला. झाडांची कत्तल झाल्यामुळे पक्ष्यांच्या अधिवासाचा प्रश्न निर्माण झाला असून, त्यांच्या प्रजनन काळाचाही विचार केला गेला नसल्याची नाराजी त्यांनी व्यक्त केली. झाडांवर अवलंबून असलेली जैवविविधता नष्ट झाली, तर पक्ष्यांच्या अन्नसाखळीवरही परिणाम होऊ शकतो, अशी चिंता त्यांनी व्यक्त केली. जंगलतोड करून प्रकल्प उभारण्यापेक्षा पर्यावरणाचे रक्षण महत्त्वाचे असल्याचे त्यांचे म्हणणे आहे.
सरकार कोट्यवधी झाडे लावल्याचा दावा करते, मग ती झाडे नेमकी कुठे आहेत, असा सवालही शिंदे यांनी उपस्थित केला. सूर्यप्रकाश आणि निसर्गाची ऊर्जा मोफत उपलब्ध असताना जंगलांचा नाश करून विकास साधण्याची गरज काय, असा प्रश्न त्यांनी विचारला. प्रकल्पग्रस्त म्हणून स्वतःलाही चौकीदाराची नोकरी करावी लागल्याचा अनुभव सांगत त्यांनी रोजगाराच्या आश्वासनांवरही प्रश्नचिन्ह उपस्थित केले.
महायुतीतही मतभेद
या वृक्षतोडीवरून महायुतीतही एकमत नसल्याचे दिसत आहे. शिंदे गटाचे महेंद्र थोरवे यांनी प्रकल्पाच्या बाजूने भूमिका मांडली असून, या प्रकल्पामुळे स्थानिकांच्या रोजगाराचा प्रश्न सुटेल असे म्हटले आहे. दुसरीकडे, राष्ट्रवादी अजित पवार गटाचे सुधाकर घारे यांनी वृक्षतोड आणि स्थानिकांच्या प्रकल्पास असलेल्या विरोधाला लक्षात घेत प्रकल्पाविरोधात आक्रमक भूमिका घेतली आहे. राज्यात दुष्काळी परिस्थिती असल्यामुळे तसेच पर्यावरणावरून वृक्षतोडीच्या निषेधार्थ यंदा दिवाळी साजरी करू नका, असे भावनिक आवाहनही शिंदे यांनी नागरिकांना केले. सायडोंगरातील वृक्षतोडीचा मुद्दा आता पर्यावरणाच्या चर्चेसोबतच स्थानिक आंदोलनाचाही विषय बनला आहे.
स्रोत: मूळ बातमी
Leave a Reply