महाराष्ट्राचे कुलदैवत असलेल्या जेजुरी गडावर सोमवती अमावस्येनिमित्त राज्यभरातून हजारो भाविक दर्शनासाठी आले आहेत. मंदिर आकर्षक फुलांनी सजवले असून भक्तीमय वातावरणात यात्रेचा उत्साह पाहायला मिळत आहे. यळकोट यळकोट जय मल्हारच्या गजरात भाविकांनी भंडारा उधळत शाही स्नानाचा सोहळा साजरा केला.
पहाटे पाच वाजता पालखी रवाना
सकाळी ठीक पाच वाजता जेजुरी गडावरून शाही स्नानासाठी पालखी मार्गस्थ झाली. या वेळी यळकोट यळकोट जय मल्हारच्या जयघोषाने संपूर्ण परिसर दणाणून गेला होता. मंदिर परिसरात भाविकांची प्रचंड गर्दी असून आजही दर्शनासाठी मोठ्या संख्येने भाविक येत आहेत.
दिवाळी आणि अमावस्येचा योग
ऐन दिवाळीमध्ये सोमवती अमावस्या आल्याने भाविकांमध्ये अधिक उत्साह दिसून येत आहे. जेजुरीचा खंडेरायाचा गड अक्षरशः पिवळ्या सोन्याने नाहून निघाला आहे. मोठ्या प्रमाणावर भंडारा उधळण्यात येत असून यळकोट यळकोट जय मल्हारचा जयघोष अखंड सुरू आहे. सोमवती अमावस्या आणि दिवाळीनिमित्त मंदिराला आकर्षक विद्युत रोषणाई देखील करण्यात आली आहे.
स्रोत: मूळ बातमी
Leave a Reply